О́SKEMEN. 26 aqpan. Shyǵys Qazaqstan oblystyq bilim basqarmasynyń «Shyǵys» óńirlik ortalyǵynyń uıymdastyrýymen alǵash ret «Úzdik jas pedagog» oblystyq baıqaýy ótti. Bul týraly egemen.kz tilshisi habarlady.
Oqýshylardyń shyǵarmashylyq saraıynda ótken «Úzdik jas pedagog» baıqaýy óńirdegi jas ustazdardyń belsendiligin arttyrý, kásibı sheberligin damytý, oqý-ádistemelik jáne tárbıelik jumysyn jaqsartý maqsatyna baǵyttalǵan. Baıqaýǵa oblystyń 16 aýdany men 3 qalasynan eńbek ótili 5 jylǵa deıingi ýaqytty qamtıtyn 19 jas pedagog qatysty.
Baıqaý 2 kezeń boıynsha ótti. Alǵashqy aýdandyq nemese qalalyq kezeńnen súrinbeı ótken pedagogtar kelesi oblystyq kezeńge joldama aldy. Oblystyq syn barysynda jas pedagogtar ózderiniń shyǵarmashylyq syrlarymen bólisip, «Men jáne meniń mamandyǵym» taqyrybyndaǵy tanystyrýlary men «Men – bolashaqtyń muǵalimimin» beınetaspasyn kórermender nazaryna usyndy.
Jarys qortyndysy boıynsha Kókpekti aýdanyndaǵy fızıka pániniń muǵalimi Dáýren Mergenshinov oblystyń «Úzdik jas pedagogi» atandy. Odan keıingi júldeli oryndarǵa semeılik geografııa páni muǵalimi Gúlbarshyn Qalymova, borodýlıhalyq geografııa páni muǵalimi Vadım Karachkovskıı, óskemendik bastaýysh synyp muǵalimi Anar Sháken, jarmalyq bıologııa páni muǵalimi Erkejan Igenbaeva ıe boldy. Sonymen birge, baıqaýda «Ozyq oıly ustaz» atalymyna Aıagóz aýdanynyń geografııa páni muǵalimi Nurbol Nurǵalıev, «Shyǵarmashyl ustaz» atalymyna О́skemen qalasynyń bastaýysh synyp muǵalimi Anar Soltanǵazına, «Talantty ustaz» atalymyna Semeı qalasynyń tarıh páni muǵalimi Aqerke Bashırova, «О́nerli ustaz» atalymyna Kúrshim aýdanynyń bastaýysh synyp muǵalimi Saıa Salyqbaeva laıyq dep tanyldy. Baıqaýǵa qatysýshylar alǵys hattar men baǵaly syılyqtarmen marapattaldy. Úzdik beınematerıaldar Shyǵys Qazaqstan oblysynyń jas pedagogtary týraly beınefılmine enetin bolady.
Dýman Anash.
Derek, sýret: egemen.kz.
