– Tólenbegen nesıe kollektorlyq kompanııaǵa nemese sot oryndaýshysyna ótkende adamdar ne isterin bilmeı, alańdap jatady. Eń aldymen bir nárseni túsiný kerek, nesıe kollektorǵa nemese sot oryndaýshysyna ótkenmen, boryshkerdiń negizgi mindettemesi sol kúıinde qalady. Sondyqtan úreılenýdiń qajeti joq. Eger qaryz kollektorlyq kompanııaǵa ótse, olar sizben baılanysqa shyǵyp, qaryzdy qaıtarý máselesin talqylaıdy. Mundaı jaǵdaıda kóbine qaryzdy bólip tóleý nemese tólem kestesin qaıta jasaý sııaqty usynys bolýy múmkin. Iаǵnı kollektorlarmen kelisip, belgili bir grafıkpen qaryzdy jabýǵa múmkindik bar. Eger eki tarap kelisimge kelse, másele sol jerde sheshilýi múmkin.
Al eger kollektorlarmen kelisimge kelý múmkin bolmasa, onda olar sotqa júginýi yqtımal. Bul da zań aıasyndaǵy qalypty úderis. Sot qaryzdy óndirý týraly sheshim shyǵarsa, is ári qaraı sot oryndaýshylaryna beriledi.
Sot oryndaýshysy iske kirisken kezde arnaıy atqarýshylyq is júrgizý ashylady. Osydan keıin sot oryndaýshysynyń belgili bir ókilettikteri bar. Mysaly, ol boryshkerdiń banktegi shotyn tekserip, qajet bolǵan jaǵdaıda ony buǵattaı alady. Iаǵnı shottaǵy qarajattan qaryzdy óndirý úderisi bastalady.
Sot oryndaýshysy boryshkerdiń múlkine de shekteý qoıýǵa quqyly. Keı jaǵdaıda qaryz somasyna baılanysty azamattyń shetelge shyǵýyna ýaqytsha tyıym salý sharasy da qoldanylýy múmkin.
Biraq bul jerde taǵy bir mańyzdy nárseni túsiný kerek. Eger adamnyń atyna tirkelgen múlki, bankte aqshasy bolmasa, onda sot oryndaýshysy óndirip alatyn naqty resýrs bolmaıdy. Mundaı jaǵdaıda is júrgizý toqtap qalmaıdy, biraq óndirip alý múmkindigi shekteledi.
Zań turǵysynan qarasaq, sot oryndaýshysy qaryzdy óndirip alý maqsatynda barlyq zańdy sharany qoldanady. Saıyp kelgende eń durys jol – máseleni sotqa jetkizbeı, múmkindiginshe kelisim arqyly sheshýge tyrysý. Qaryzdy moıyndap, naqty tólem kestesin jasap, birtindep óteý kóbine eń tıimdi sheshim bolady.
