Otandyq mýzykanttar Soltústik Afrıkanyń eń iri sahnalarynyń biri – Opéra d’Alger-de óner kórsetip, Aljır operasynyń sımfonııalyq orkestrimen birge shyǵarmashylyq tájirıbesin ortaǵa saldy. Konsert baǵdarlamasynda Astor Pıassolla men Antonıo Vıvaldıdiń klassıkalyq týyndylary, sondaı-aq uly Abaıdyń rýhynan shabyt alǵan fransýz kompozıtory Per Tıllýanyń «Abaıdyń armany» atty sımfonııalyq shyǵarmasy bar.
Aljırdiń Mádenıet mınıstrliginiń shaqyrýymen ári Qazaqstannyń Aljırdegi elshiliginiń qoldaýymen júzege asqan sapar aıasynda trıo músheleri «Higher National School of Music of Algiers» oqý ornynda sheberlik sabaqtaryn ótkizip, jas mýzykanttarmen tájirıbe bólisti. Otandyq oryndaýshylyq dástúrdi tanystyrý – gastroldik sapardyń mańyzdy bir bóligi bolyp tarıh qoınaýyna endi.
«Forte trio» memlekettik trıosy – elimizdegi fortepıano, skrıpka, vıolonchelden turatyn alǵashqy hám jalǵyz memlekettik ansambl. Ujymnyń kórkemdik jetekshisi – belgili pıanıst, professor Tımýr Ýrmancheev. Quramynda halyqaralyq baıqaýlardyń laýreattary Maqsat Júsipov (skrıpka) pen Murat Narbekov (vıolonchel) óner kórsetedi. Qurylǵanynan bergi 13 jyl ishinde trıo halyqaralyq sahnalarda Qazaqstannyń oryndaýshylyq mektebin tanytyp, álemniń túkpir-túkpirinde mýzykalyq dıalog ornatty. Gastroldik kartasyna Kanada, Italııa, Fransııa, Germanııa, AQSh, Aýstrııa, Chehııa, Brazılııa, Qytaı jáne basqa elder kiredi.
Iá, mýzyka shekarany bilmeıdi. «Forte trio» dál osyny kórermenge sezdirip, júrekterge umtylmas áser qaldyrdy.
