Foto: primeminister.kz
«О́rt qaýpi bar kezeń bolsa endi ǵana bastalyp jatyr. Birqatar óńirde tabıǵı qoryqtar men orman sharýashylyqtarynyń aýmaǵy jandy. Dalaly jerlerde de órt oshaqtary kún saıyn tirkeledi. Daladan bastalǵan qyzyl jalyn orman qoryna aýysýy múmkin. О́rtter flora men faýnaǵa aıtarlyqtaı zııan keltiredi. Barlyq qyzmetter jedel áreket etýge daıyn bolýy kerek», dedi Oljas Bektenov.
Jıynda ekologııa jáne tabıǵı resýrstar mınıstri Erlan Nysanbaev, TJ mınıstri Shyńǵys Árinov, Jasandy ıntellekt jáne sıfrlyq damý vıse-mınıstri Málik Oljabekov, sondaı-aq Abaı, Shyǵys Qazaqstan, Aqmola, Qostanaı jáne Pavlodar oblystarynyń ákimderi baıandama jasady.
Erlan Nysanbaevtyń málimetinshe, jyl basynan beri elimizde jalpy aýdany 794 gektardan asatyn 36 orman órti tirkelgen. «Qazgıdromet» boljamyna sáıkes, 2026 jyldyń kóktem-jaz maýsymynda aýa temperatýrasy qalypty kórsetkishten 1-2 gradýsqa joǵary bolady. Sáýirdiń ekinshi jartysynda ońtústik pen batysta aýa temperatýrasy +25...+35°C-qa deıin kóterilýi múmkin.
Osyǵan baılanysty órt qaýpin azaıtý jónindegi respýblıkalyq jospar júzege asyrylyp, erte anyqtaý júıeleri engizilip jatyr.
TJ mınıstri Shyńǵys Árinovtiń aıtýynsha, el boıynsha 50 myńnan astam jeke quram jáne 11 myń tehnıka daıyndyqqa keltirilgen. Sonymen qatar 5 myńnan astam qyzmetker, 853 tehnıka, 26 áýe kemesi jáne 218 ushqyshsyz ushý apparaty jumyldyrylǵan.
О́rtti erte anyqtaý jáne basqarýdy jedeldetý úshin sıfrlyq jáne ǵaryshtyq monıtorıng 24/7 rejıminde júrgizilip jatyr.
Jasandy ıntellekt jáne sıfrlyq damý mınıstrligi órtti boljaý júıelerin engizip jatyr. Atap aıtqanda, Tasqyn júıesinde órt qaýiptilik kartalary iske qosylyp, jylý núktelerin óńdeý ýaqyty 20-30 mınýtqa deıin qysqartylǵan.
Abaı oblysynda jyl basynan tirkelgen 2 orman órti zardapsyz joıylǵan. Shyǵys Qazaqstan, Aqmola, Qostanaı jáne Pavlodar oblystarynda da daıyndyq kúsheıtilip, tehnıka men áýe patrýlderi iske qosylǵan.
Alaıda keıbir óńirlerde tazartý jumystary tolyq aıaqtalmaǵan, bul eldi mekender úshin qaýip tóndiredi.
Oljas Bektenov «Semeı ormanynda» JI negizindegi órtti erte anyqtaý júıesin tekserdi
Otyrystyń qorytyndysynda Oljas Bektenov birqatar naqty tapsyrma berdi:
- óńirlerdi avıapatrýldeýmen tolyq qamtamasyz etý;
- áýe kemelerin sý shashatyn qurylǵylarmen jabdyqtaý;
- ushqyshsyz apparattardy keńinen paıdalaný;
- jedel shtab quryp, 24/7 monıtorıng júrgizý;
- órt qaýpi joǵary aýmaqtardy tazartý jáne mıneraldy jolaqtar jasaý.
Sonymen qatar Ishki ister mınıstrligine ormandarda azamattardyń demalýyna shekteý qoıý, reıdter uıymdastyrý jáne órt qaýipsizdigin buzýshylardy jaýapkershilikke tartý tapsyryldy.
«Ákimdiktermen birlesip, órt qaýipsizdigi talaptaryn tolyq oryndaý qajet. Barlyq jumystar belgilengen merzimde júzege asyrylsyn», dep tapsyrdy Premer-mınıstr.
О́rt qaýpi joǵary kezeńde barlyq jumystardyń oryndalýyn úılestirý Premer-mınıstrdiń orynbasary Qanat Bozymbaevqa júkteldi.
Oljas Bektenovke Alakóldi damytýdyń keshendi jospary tanystyryldy
