Atyraýdaǵy qurylys salasynda kemshilik joıylǵan joq

ATYRAÝ. 26 aqpan. Atyraý oblysynyń ákimi Baqtyqoja Izmuhambetov qurylys salasyndaǵy kemshilikterdiń áli de joıylmaı otyrǵanyn málimdedi. Bul týraly egemen.kz. tilshisi habarlady. Ákimniń málim etýinshe, qurylys salasyndaǵy kemshilikter Atyraý qalasynda da, aýdandarda da kezdesedi. «Kóp úıler ýaqytynda tapsyrylmady. Qurmanǵazy, Inder, Qyzylqoǵa aýdandary eki aıda salyp tastaıtyn úsh bólmeli, bir qabatty úılerdi eki jyldan beri áli tapsyrǵan joq. 60 páterli 9 úı de aýdandarda byltyr berilýge tıis edi. Injenerlik-kommýnıkasııalyq jeli men úı qurylysy josparynda sáıkessizdik bar. Bul jerde keıbir qurylys kompanııalary men jobalaýshylardyń da jaýapsyzdyǵyn aqtap ala almaımyz», dep Atyraý oblysynyń ákimi Baqtyqoja Izmuhambetov jurtshylyqpen kezdesýde máseleni tótesinen qoıdy. Sonymen birge, Atyraý qalasyndaǵy halyqaralyq áýejaı mańynan jeke turǵyn úı qurylysyn júrgizýge 90 jer telimi berilgenine de toqtaldy. Jer telimi nege ushaqtar ushyp-qonatyn aýmaqqa taıaý mańnan berilgeni ázirge túsindirilmeı otyr. Biraq, jer telimin alǵandar arasynan 40 adam qurylys jumystaryn bastap jibergen. Ákimniń pikirinshe, endi bulardyń barlyǵyna qalanyń basqa aýdanynan jer telimi, al turǵyn úı qurylysy jumystaryn júrgizgenderge ótemaqy berilýi qajet. Joldasbek Shópeǵul. Derek: egemen.kz. Sýret: Rahym Qoılybaev.