Vedomstvo atalǵan máselege qatysty mynadaı mańyzdy jaıttardy alǵa tartty:
«Birinshiden, «Qazaqfılm» kınostýdııasynyń mýzeı qorynda «Qyz Jibek» fılminde paıdalanylǵan bir kamzoldyń túpnusqasy saqtaýly. Bul jádiger ulttyq kıno óneriniń mańyzdy mádenı murasy retinde qorǵalǵan. Al prodıýser jarııalaǵan jazbadaǵy ekinshi kamzoldyń jeke qolǵa qalaı ótkendigi anyqtalýda.
Ekinshiden, «Qazaqfılm» kınostýdııasy ulttyq fılmderde paıdalanylǵan qundy rekvızıtterdi, kostıýmder men basqa da tarıhı mańyzy bar zattardy júıeli túrde jınaqtap, qalpyna keltirý jáne saqtaý jumystaryn júrgizip keledi. Bul baǵyttaǵy jumys ulttyq mádenı murany keleshek urpaqqa jetkizýge baǵyttalǵan.
Úshinshiden, qazirgi ýaqytta «Qazaqfılm» janynan zamanaýı talaptarǵa saı keletin aýqymdy mýzeı ashý josparlanýda. Atalǵan mýzeıde otandyq kıno tarıhyna qatysty biregeı eksponattar qoıylyp, kelýshilerge keńinen tanystyrylatyn bolady», delingen habarlamada.
Mınıstrlik mádenı qundylyqtardy qorǵaý máselesine erekshe mán beretinin jáne qoǵamda týyndaǵan kez kelgen suraqqa ashyq jaýap berýge daıyn ekenin málimdedi.
