Ranking.kz sarapshylary 2025 jylǵy statıstıkalyq málimetterdi negizge ala otyryp, osy baǵytta arnaıy zertteý júrgizdi.
2025 jyldyń qorytyndysy boıynsha, 15 pen 19 jas aralyǵyndaǵy ár 1 myń qyz balaǵa shaqqandaǵy týý koeffısıenti respýblıka boıynsha 12,96 deńgeıinde tirkeldi. Bul kórsetkish aýyldyq jerlerde qalaǵa qaraǵanda áldeqaıda joǵary bolyp shyqty.
Jasóspirimder arasyndaǵy bala týý deńgeıi myna óńirlerde basym:
- Jambyl oblysy – 19,67;
- Mańǵystaý oblysy – 18,87;
- Túrkistan oblysy – 18,51.
Dúnıejúzilik densaýlyq saqtaý uıymynyń málimetinshe, jasóspirim qyzdar arasyndaǵy ólim-jitimniń basty sebebi – júktilik pen bosaný kezindegi medısınalyq asqynýlar. Qazaqstanda 2024 jyly 616 kámeletke tolmaǵan qyz bala resmı nekege turdy. Statıstıka kórsetkendeı, qyzdar kóbine ózderinen áldeqaıda eresek er adamdarmen otbasyn qurady. Mysaly, kámeletke tolmaı úılengen uldardyń sany qyzdarǵa qaraǵanda 10 ese az.
Aqtóbe oblysynda bir jylda 100-ge jýyq jasóspirim qyz júkti bolyp qalǵan
Sarapshylar Túrkistan jáne Qyzylorda oblystarynyń derekterin salystyrdy. Qyzylorda oblysynda jalpy týý kórsetkishi joǵary bolǵanymen, jasóspirimder arasyndaǵy bala týý deńgeıi respýblıkalyq ortasha kórsetkishten tómen. Bul óńirde negizinen 25-39 jas aralyǵyndaǵy eresek áıelder bosanady. Al Túrkistan oblysynda kerisinshe, jas analardyń úlesi basym.
Tipti 10-14 jas aralyǵyndaǵy búldirshinderdiń ana ataný jaǵdaılary Ulytaý, Qaraǵandy jáne Qostanaı oblystarynda da tirkelgen.
