Saltanatty jıyn Qazaqstan Respýblıkasy Prezıdentiniń ishki saıasat máseleleri jáne kommýnıkasııalar jónindegi kómekshisi Arman Qyryqbaevtyń quttyqtaý sózimen ashyldy.
«Memleket basshysy árdaıym qoǵamda kitap oqý mádenıetin damytýǵa erekshe mán beredi. 2024 jyly Ulttyq quryltaıdyń úshinshi otyrysynda Prezıdent «Kitap oqıtyn ult» tujyrymdamasyn usynǵan edi. Atalǵan tujyrymdama negizinde byltyrdan bastap 23 sáýir Ulttyq kitap kúni bolyp belgilendi», dedi Arman Qyryqbaev.
Sondaı-aq, Prezıdent kómekshisi aldaǵy eki aptada Memleket basshysy kitap oqý mádenıetin keńinen nasıhattaýǵa jáne zııatker ult qalyptastyrýǵa baǵyttalǵan arnaıy Jarlyqqa qol qoıatynyn jetkizdi.
Is-sharaǵa Parlament depýtattary, belgili aqyn-jazýshylar, memleket jáne qoǵam qaıratkerleri, sondaı-aq kitaphana basshylary qatysty.
«Ulttyq kitap» respýblıkalyq baıqaýy otandyq avtorlardy qoldaýǵa, baspa isin damytýǵa jáne qazaq ádebıetiniń, rýhanııatynyń damýyna baǵyttalǵan. Bıyl baıqaýǵa 32 baspadan 155 ótinim tústi. Qatysýshylar sońǵy eki jylda jaryq kórgen otandyq avtorlardyń shyǵarmalaryn usyndy.
Jeńimpazdar toǵyz nomınasııa boıynsha anyqtaldy. Olardyń qatarynda «Balalarǵa arnalǵan úzdik kitap», «Úzdik komıks», «Non-fıkshn baǵytyndaǵy úzdik kitap», «Detektıv janryndaǵy úzdik kitap», «Satıra janryndaǵy úzdik kitap», «Úzdik ıllıýstrasııalyq kitap», «Úzdik aýdarma kitap», «Fantastıka janryndaǵy úzdik kitap» jáne «Úzdik baspa» bar. Sonymen qatar «Jyl kitaby» atalymy boıynsha jeńimpaz esimi belgili boldy. Bul marapat Abaı Qunanbaıulynyń qara sózderi negizinde jazylǵan «Urpaqqa ósıet» kitaby úshin Gúlmıra Amandyqovaǵa tabystaldy. Barlyq jeńimpazǵa aqshalaı syılyqtar berildi.
«Ulttyq kitap» baıqaýy otandyq qalamgerler men baspagerlerdiń eńbegin dáripteıtin mańyzdy alań retinde qalyptasyp, kitap oqý mádenıetin nyǵaıtýǵa jáne qoǵamnyń qazaq ádebıetine degen qyzyǵýshylyǵyn arttyrýǵa yqpal etip keledi.
Saltanatty rásim aıasynda elimizdiń túkpir-túkpirinen kelgen kitaphanashylar men baspa salasynyń ókilderi «Mádenıet salasynyń úzdigi» tósbelgisimen jáne «Qurmet» gramotasymen marapattaldy.
Ulttyq kitap kúnine arnalǵan kitap aptalyǵy aıasynda búgin el kóleminde sońǵy kún «Kitap – dostyq ambassadory» ataýymen ótti. Bul kún otandyq ádebıetti shetel oqyrmany arasynda nasıhattaýǵa baǵyttaldy.
Kitap aptalyǵynyń sońǵy kúninde respýblıka boıynsha kitaphanalarda, mádenıet jáne bilim berý uıymdarynda shyǵarmalary shet tilderge aýdarylǵan qazaqstandyq avtorlardyń, sondaı-aq kásibı aýdarmashylar men baspagerlerdiń qatysýymen kezdesýler uıymdastyryldy.
Atap aıtqanda, Astanada IX «Astana Eurasian Book Fair – 2026» halyqaralyq kitap kórme-jármeńkesi aıasynda kitap tanystyrylymdary ótip, Halyq jazýshysy, aqyn Muhtar Shahanovtyń shyǵarmashylyǵyna arnalǵan «Ǵasyrdyń ǵalamat aqyny» kórmesi usynyldy. Almaty qalasynda «Álemdi biriktirgen – Qazaq kitaby» atty ádebı kvest ótkizilip, Berdibek Soqpaqbaevtyń «Meniń atym Qoja» povesiniń shet tilderdegi aýdarmalary tanystyryldy. Sondaı-aq «Qazaq ádebıeti – álem tilderinde» atty kitap kórmesi uıymdastyryldy.
Jalpy, kitap aptalyǵy aıasynda el kóleminde ótken is-sharalarǵa 200 myńǵa jýyq adam qatysty.
Aıda Balaeva: Kitap oqýǵa qyzyǵýshylyq turaqty túrde artyp keledi
Aıta keteıik, búgin Qazaqstanda Memleket basshysynyń bastamasymen bekitilgen Ulttyq kitap kúni atap ótilip jatyr. Ataýly kún halyqtyń kitap oqýǵa degen qyzyǵýshylyǵyn arttyrýǵa, oqý mádenıetin jańǵyrtýǵa jáne zııatkerlik áleýetti damytýǵa baǵyttalǵan.
