MILAN. 27 maýsym. Búgin jergilikti ýaqyt boıynsha saǵat 10-da (Astana ýaqytymen – 02:00) «EXPO Milano-2015» kórmesiniń baspasóz ortalyǵynda Qazaqstannyń ulttyq kúni resmı túrde ashyldy. Bul týraly egemen.kz tilshisi habarlady.
Saltanatqa Qazaqstan Prezıdenti Nursultan Nazarbaev pen Italııa aýyl sharýashylyǵy mınıstri Maýrısıo Martına qatysyp, sóz sóıledi. Shara eki eldiń gımnderi oınalyp, memlekettik týlarynyń kóterilýimen aıaqtaldy.
Kelesi kezekte Memleket basshysy bastaǵan delegasııa kórmedegi Qazaqstan pavılonyn aralap kórdi. Budan keıin Italııa pavılonyn akt zalynda ótken eki eldiń resmı jáne isker tulǵalarynyń bıznes-forýmyna qatysýymen bıznes-forým ótti. Jıynǵa sondaı-aq Qazaqstan Prezıdenti Nursultan Nazarbaev pen Italııa Premer-mınıstri Mateo Rensı qatysty. Jıyn qorytyndysynda memleket aralyq 20-ǵa jýyq birlesken qujatqa qol qoıyldy. Olardyń jalpy somasy 500 mln. asa dollardy quraıdy.
EKSPO aıasynda kórmege qatysýshy elderdiń ulttyq kúnderin ótkizý dástúrge aınalǵan. Expo Milano 2015 kórmesine qatysýshy 147 eldiń 110-ynda óz elderine arnalǵan pavılondar bar. Qazirge deıin bulardyń arasyndaǵy Túrikmenstan, Marokko, Argentına, Týnıs, Qyrǵyzstan, Kongo jáne Ulybrıtanııanyń ulttyq kúnderin ótkizip úlgergen.
Ulttyq kún – óz elińdi tanystyrýǵa, onyń tarıhy men dástúrleri týraly baıandap berýge múmkindik beretin EKSPO kórmeleriniń ajyramas bir bóligi. Qazaqstan Dúnıejúzilik kórmege 2005 jyldan beri qatysyp keledi. Alaıda, dál osy jyly elimizdiń pavılony aıryqsha orynǵa ıe bolyp otyr. Qazaqstan pavılonynyń EXPO Milano 2015 kórmesindegi alǵashqy eki aı ishindegi jumysy týrıster men kórme qonaqtarynyń elimizge degen qyzyǵýshylyqtary asa joǵary ekendigin baıqatty.
Nemistiń FactsandFiction kompanııasy salǵan Qazaqstan pavılony «Qazaqstan – múmkindikter eli» degen taqyryp boıynsha tanystyryldy. Italııanyń BAQ-tary málimetterine qaraǵanda, Qazaqstan pavılony adamdar eń kóp keletin pavılondardyń bestigine kirip otyr. Muny bir mezgilde 80 adamdy qabyldap ala alatyn pavılonǵa kelýshiler sanynyń kúnine 4500 adamǵa jetetininen de baıqaýǵa bolady. Sonymen qatar, ıtalıandyq Reppublica gazetiniń platformasynda uıymdastyrylǵan daýys berýdiń nátıjesinde alynǵan málimetter boıynsha Qazaqstan pavılony búgingi kúnge deıin Kolýmbııadan keıin ekinshi oryndy ıelenip keldi.
Qazaqstan pavılony óz aldyna eki maqsatty qoıyp otyr. Onyń birinshisi ózgelerge elimizdi laıyqty deńgeıde tanytyp, dúnıejúzilik jármeńkedegi basty kórikti orynǵa aınalý bolsa, ekinshisi Astanada ótetin EKSPO-2017 kórmesinde qonaqtardy osy kórmeden esh kem túspeıtin úlken shoý kútip turǵanyn dáleldeýge saıady.
«EKSPO-nyń Mılannan keıingi kórmesi Astanada ótetindikten, Qazaqstan pavılony eki mindetti oıdaǵydaı atqaryp shyǵýy tıis, ol EKSPO-2015 kórmesindegi basty kórneki oryn retinde tanylyp, elimizdiń osyndaı aýqymdaǵy is-sharany 2017 jyly óz aýmaǵynda ótkizýge daıyn ekendigin kórsetýi kerek», - dep atap ótti «Expo Milano 2015» Dúnıejúzilik kórmesindegi Qazaqstan Respýblıkasy Ulttyq seksııasynyń bas komıssary Ánýarbek Mýsın.
Kórme jumys jasap jatqan ýaqyt ishinde Qazaqstan pavılonyn birqatar memleketterdiń saıası, mádenı zııaly qaýym ókilderi – Monako hanzadasy, Qytaı premer-mınıstri, Germanııa, Vengrııa ekonomıka mınıstrleri, London mári kórýge kelgen.
3000-nan asa sharshy metr aýmaqty alyp jatqan eki qabatty ǵımarat «Jer sharýashylyǵy», «Mal sharýashylyǵy», «Qazaqstan týraly qyzyqty derekter», «Qazaqstandaǵy akvamádenıet», «Qazaqstan ekologııasy» jáne «Aýylsharýashylyqtyń keleshegi» degen túrli taqyryptarǵa arnalǵan birneshe ekspozısııalyq aımaqtarǵa bólingen. Pavılonǵa kelýshiler tabıǵat jáne aýylsharýashylyq qorlaryn qorǵaý máselesimen, Qazaqstan mádenıetimen jáne elimizdiń umtylyp otyrǵan turaqtý damý týraly ıdeıalarymen tanysa alady.
Sońynan Qazaqstan óner sheberleri merekelik konsert qoıdy.
