«Aýylymyzda kezinde halyq kóp edi. Buryn tańerteń mektepke shyqqan balalar kóshege syımaıtyn. Anaý úıden on bala shyqsa, mynaý úıden tórt bala mektepke shyǵatyn», deıdi Ásıpa áje jan-jaǵyndaǵy bos turǵan úılerdi nusqap.
Búginde Arshaty orta mektebinde 32 oqýshy bilim alyp, 20 pedagog eńbek etedi. Ustazdardyń basym bóligi – joǵary bilimdi mamandar. Bilim sapasy 74 paıyzdy qurap, aýdan mektepterimen salystyrǵanda jaqsy kórsetkishke ıe. Bıyl mektepti 4 túlek aıaqtasa, keler jyly bar bolǵany 28 oqýshy ǵana qalady. Birinshi synypqa qabyldanatyn bala joq. Bul degenimiz, aýyldaǵy jas otbasylar sanynyń azdyǵymen baılanysty. Degenmen, mektepke jas mamandar kelip jatyr. Bıyl qatarǵa Dınara Shaımardanova men Nazykesh Túrkistanova syndy jastar qosyldy. Olardyń biri ınformatıka, matematıka pánderinen sabaq berse, ekinshisi, pedagog-uıymdastyrýshy qyz-metin atqarady.
Aıta keterligi, mekteptiń materıaldyq-tehnıkalyq bazasyn jaqsartý baǵytynda jumys júrgizilip jatqan kórinedi. Mektep ujymynyń aıtýynsha, 1972 jyly salynǵan ǵımaratqa kúrdeli jóndeý qajet. Qazirgi tańda jylý batareıalary men terezeler aýystyrylǵan. Al elektr jelilerin jańartý úlken másele bolyp tur.
Aıtqandaı, aýyl túlekteri mektepke demeýshilik jasap, qorshaýy jańartyldy, mektepke sý tartylǵan. Aldaǵy ýaqytta sportzalǵa da sý kirgizý josparlanyp
otyr.
Mektep muǵalimderiniń aıtýynsha, bilim ordasyndaǵy shaǵyn ortalyqta 7 bala tárbıelenip jatyr. Oqýshylar bolsa, oblystyq, aýdandyq olımpıadalar men ǵylymı jobalarǵa qatysyp, júldeli oryndar ıelenip júr. Bul – ustazdar eńbeginiń jemisi.
Bilim ordasynyń basshysy – Janerke Qurmetjanova. 20 jyldyq eńbek ótili bar tájirıbeli pedagog retinde ujymdy alǵa jetelep otyr. Osyndaǵy jas mamandardyń biri – tarıh pániniń muǵalimi Aqjol Meıirbekuly. Ol Arshatyda týyp-ósip, joǵary bilim alǵan soń, týǵan aýylyna oralǵan. Onyń aıtýynsha, muǵalim bolý – bala kúngi armany. Qazirgi tańda 6–10 synyptarǵa sabaq berip, oqýshylaryn túrli bilim báıgesine daıarlap júr.
«Armanym – osy mekteptiń damýyna úles qosý, týǵan aýylymda eńbek etý. Jastarǵa da aıtarym, aýylda qalyp, týǵan jerdi kórkeıtýge atsalysaıyq», deıdi jas ustaz Aqjol Meıirbekuly.
Búginde Arshaty mektebiniń aldynda úlken mindet tur. Iаǵnı oqýshy sanyn arttyrý, aýylǵa jańa otbasylardy tartý. Osy baǵytta aýyldyq okrýg ákimi kóshi-qon jármeńkelerine qatysyp, júıeli jumys júrgizip jatqan kórinedi. Nátıjesi ýaqyt enshisinde. Arshatydaı arshaly meken ıen qalmaýǵa tıis.
Shyǵys Qazaqstan oblysy,
Katonqaraǵaı aýdany
