Is-sharany «Atameken» Qazaqstan Respýblıkasy Ulttyq kásipkerler palatasy uıymdastyrdy. Talqylaýǵa «Atameken» UKP Tóralqa Tóraǵasy Qanat Sharlapaev, Almaty qalasy ákiminiń orynbasary Nurlan Ábdirahym, Kazakh Tourism Development bas atqarýshy dırektory Erjan Erkinbaev, Týrızm jáne sport vıse-mınıstri Baýyrjan Rapıkov, Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev, óńirlik jáne salalyq keńesterdiń, salalyq qaýymdastyqtardyń, bıznes qaýymdastyqtardyń ókilderi, sondaı-aq sarapshylar men joba ázirleýshileri qatysty.
Bul keńes is-sharaǵa qatysýshylardyń basyn qosyp, óńirdiń taý týrıstik ınfraqurylymynyń bolashaǵyna arnalǵan kásibı dıalog alańyna aınaldy. «Atameken» UKP Tóralqa Tóraǵasy Qanat Sharlapaev óz sózinde taý klasterin damytýǵa júıeli tásil qajet ekenin atap ótti.
Almaty taý klasteriniń áleýeti joǵary: Halyqaralyq mamandar pikiri bir arnada toǵysty
«Almaty taý klasterin damytý – jaı ǵana ınfraqurylymdyq joba emes, týrızmniń, bıznestiń jáne jumyspen qamtýdyń turaqty ósimin qamtamasyz ete alatyn jańa ekonomıkalyq model qalyptastyrý. Almatynyń kásipkerliktiń basty ortalyǵy ári Ortalyq Azııadaǵy týrısterdi tartatyn negizgi núkte retindegi mártebesin nyǵaıtý qajet», dedi Palata basshysy.
Keńes barysynda Almaty qalasy týrızm basqarmasynyń basshysy Ǵalııa Toqseıtova Almaty taý klasterin damytý tujyrymdamasyn tanystyrdy. Joba biryńǵaı ózara baılanysqan ınfraqurylym qalyptastyrýdy, jyl boıǵy týrıstik usynystardy damytýdy, servıs pen qaýipsizdik deńgeıin arttyrýdy, sondaı-aq ártúrli rekreasııalyq aımaqtardy ortaq júıege biriktirýdi kózdeıdi.
Talqylaýdyń negizgi elementteriniń biri – «Almaty Superski» jobasy. Joba halyqaralyq deńgeıdegi zamanaýı jyl boıǵy týrıstik ınfraqurylym qalyptastyrýǵa jáne Almatyny Ortalyq Azııadaǵy taý týrızminiń ortalyǵy retinde damytýǵa baǵyttalǵan. Usynylǵan materıaldarǵa sáıkes, joba aıasynda 1022 gektar aýmaqta ınfraqurylymdy damytý, 17 aspaly kótergish salý, ártúrli kúrdelilik deńgeıindegi 60 shaqyrymnan astam shańǵy trassasyn jasaý, sondaı-aq kólemi 20 gektar bolatyn zamanaýı taý aýylyn salý josparlanǵan. Al Almaty taý klasterin damytýdyń jalpy tujyrymdamasy 30-ǵa deıin aspaly jol salýdy, jalpy uzyndyǵy shamamen 151 shaqyrym bolatyn taý shańǵysy trassalaryn damytýdy jáne táýliktik qamtý qabiletin 30 myń adamǵa deıin arttyrýdy qamtıdy.
Jobanyń jyl boıy paıdalanýǵa baǵyttalǵany erekshe atap ótildi. Qysqy týrızmnen bólek, haıkıng baǵyttaryn, velojoldardy, maýntınbaık ınfraqurylymyn damytý, zamanaýı vızıt-ortalyqtar qurý jáne taýda biryńǵaı qaýipsizdik júıesin qalyptastyrý qarastyrylǵan.
Prezentasııa barysynda joba ázirleýshileri ekologııalyq turaqtylyq máselesine erekshe nazar aýdardy. Jobany daıyndaý kezinde ekologııa, gıdrologııa, zoologııa, topyraqtaný jáne tabıǵatty turaqty paıdalaný salalaryndaǵy ǵylymı ınstıtýttar men sarapshylarmen birlesken júıeli jumys júrgizilip jatqany aıtyldy. Usynylǵan tásilder týrısterdi tartý isin basqarýdy, uıymdastyrylǵan ınfraqurylymdy damytýdy jáne taý ekojúıesine túsetin antropogendik júktemeni azaıtýdy kózdeıdi. Bul týrızmdi damytý men óńirdiń tabıǵı ortasyn saqtaý arasyndaǵy tepe-teńdikti qamtamasyz etýge múmkindik beredi.
«Almaty Superski – Almaty týrızmin jańa deńgeıge kóterýge tıis strategııalyq joba. Bul tek taý kýrortyn salý emes, halyqaralyq deńgeıdegi zamanaýı jyl boıǵy týrıstik ekojúıe qurý barysyndaǵy bastama. Qazaqstan úshin bul týrısterdi, ınvestısııalardy tartatyn jáne halyqaralyq sporttyq is-sharalardy ótkizýge múmkindik beretin jańa ortalyq qalyptastyrý tásili. Kýrort keńistigi jasyna jáne fızıkalyq múmkindigine qaramastan, ár adamǵa qoljetimdi ári yńǵaıly bolady», dedi Kazakh Tourism Development bas atqarýshy dırektory Erjan Erkinbaev.
Talqylaýdyń eleýli bóligi jobany júzege asyrýdyń áleýmettik-ekonomıkalyq áserine arnaldy. Usynylǵan baǵalaýlarǵa sáıkes, 2028 jylǵa qaraı ishki týrıster sany 1,7 mln adamnan 3,4 mln adamǵa deıin, al sheteldik týrıster sany 600 myńnan 2,5 mln adamǵa deıin ósýi múmkin. Bul óz kezeginde týrızm salasyndaǵy jumyspen qamtýdy 89,4 myń adamnan 119 myń adamǵa deıin arttyrýǵa jáne salyq túsimderin 91,5 mlrd teńgeden 185,9 mlrd teńgege deıin ulǵaıtýǵa múmkindik beredi. Keńeske qatysýshylar sońǵy jyldary Ortalyq Azııa elderi taý týrıstik ınfraqurylymyn damytýǵa belsendi ınvestısııa salyp jatqanyn da atap ótti. О́zbekstan men Qyrǵyzstandaǵy zamanaýı kýrorttar turaqty týrıstik aǵyn qalyptastyryp, sheteldik qonaqtardy tartatyn ortalyqtarǵa aınalyp keledi. Osy turǵyda Almatynyń iri týrıstik ári kólik haby retindegi áleýetin eskere otyryp, Qazaqstanda da osyndaı ınfraqurylymdy jedel damytý qajettigi tilge tıek etildi.
Kezdesýge qatysýshylardyń pikirinshe, Almaty taý klasterin damytý shaǵyn jáne orta bıznes úshin mańyzdy draıverge aınalyp, qonaqjaılylyq, qoǵamdyq tamaqtaný, kólik, servıstik qyzmetter men sıfrlyq sheshimder salasynda jańa múmkindikter ashady. Sonymen qatar joba ekonomıkany ártaraptandyrý jáne shıkizattyq emes salalardy damytý jónindegi memlekettik basymdyqtarǵa sáıkes keledi.
Sonymen birge qatysýshylar mundaı ınfraqurylymdyq bastamalardy júzege asyrý qoǵamdyq talqylaýmen qatar júretinin atap ótti. Osyǵan baılanysty aýmaqty damytý barysynda ekonomıkalyq, ekologııalyq jáne áleýmettik aspektilerdi eskeretin teńgerimdi tásildiń mańyzdylyǵy aıtyldy.
Jalpy, kezdesý Almaty taý klasterin Almatynyń ınvestısııalyq tartymdylyǵyn arttyrýǵa, jańa jumys oryndaryn qurýǵa jáne Qazaqstannyń halyqaralyq týrıstik naryqtaǵy pozısııasyn nyǵaıtýǵa qabiletti uzaqmerzimdi joba retinde damytý perspektıvalary jónindegi ortaq túsinik qalyptastyrýǵa múmkindik beredi.
