Foto: Qorǵanys mınıstrligi
Qorǵanys mınıstrliginiń málimetinshe, 2014 jyldan beri 900-den astam otandyq áskerı qyzmetshi Birikken Ulttar Uıymynyń túrli bitimgerlik mıssııalaryna qatysqan. Qazirgi ýaqytta 154 áskerı qyzmetshi Taıaý Shyǵys pen Afrıkadaǵy BUU-nyń 11 mıssııasynyń 7-ýinde qyzmet atqaryp júr.
Otandyq bitimgerler Batys Saharada, Ortalyq Afrıka Respýblıkasynda, Kongo Demokratııalyq Respýblıkasynda, Lıvan men Ońtústik Sýdanda áskerı baqylaýshy jáne shtab ofıseri retinde mindet atqarady.
Memleket basshysynyń tapsyrmasyna sáıkes, Qorǵanys mınıstrligi otandyq bitimgerlerdiń halyqaralyq mıssııalarǵa qatysý sheńberin keńeıtý baǵytyndaǵy jumysty jalǵastyryp keledi. Osyǵan oraı 2024 jyldan bastap ulttyq kontıngent Golan jotalaryndaǵy BUU mıssııasyna qatysa bastady.
Kontıngentti sheteldik mıssııaǵa jiberer aldynda áskerı qyzmetshiler BUU talaptaryna saı keshendi daıyndyqtan ótti. Olarǵa qajetti tehnıka, zamanaýı qarý-jaraq pen arnaıy jabdyqtar tolyq qamtamasyz etilgen.
Bitimgerlerdi daıarlaý Qorǵanys mınıstrliginiń Bitimgerlik operasııalar ortalyǵynda júrgiziledi. Munda áskerı qyzmetshiler halyqaralyq gýmanıtarlyq quqyqty, aǵylshyn tilin, áskerı medısınany, mınasyzdandyrý tásilderin meńgerip, patrýldeý men baqylaý beketterinde qyzmet etý mashyǵyn shyńdaıdy.
Qazaqstan – BUU-dan bitimgerlik mıssııaǵa qatysýǵa derbes mandat alǵan postkeńestik keńistiktegi alǵashqy ári jalǵyz memleket. Golan jotalarynda ulttyq kontıngenttiń ornalastyrylýy otandyq armııanyń kásibı daıarlyǵy men jaýyngerlik qabiletiniń halyqaralyq deńgeıde moıyndalǵanyn kórsetti.
BUU mıssııasynyń qolbasshylyǵy da otandyq áskerı qyzmetshilerdiń joǵary kásibıligine oń baǵa berip, olardyń bitimgerlik qyzmetke qosqan úlesin erekshe atap ótti.
Buǵan deıin, bitimgerlerdiń BUU mıssııasyna daıyndyǵy tekserilgeni habarlaǵan edik.
