Memleket basshysy Qasym-Jomart Toqaev densaýlyq saqtaý salasyn damytýǵa, ásirese aýyldyq jerlerdegi medısınalyq ınfraqurylymdy jańǵyrtýǵa erekshe kóńil bólip keledi. Prezıdent tapsyrmasyna sáıkes Ulytaý oblysynyń qala-aýdandarynda jańa medısınalyq nysandar salynyp, halyqqa kórsetiletin qyzmet sapasy jaqsara bastady. О́ńirde medısına salasynyń sapasyn jaqsartýǵa qatysty jumystar júıeli júrgizilip keledi. Oblys qurylǵaly beri 26 jańa nysan ashyldy. Eki medısınalyq mekemede kúrdeli jóndeý jumysy tolyq aıaqtaldy. Qazirgi ýaqytta taǵy bes nysanda jóndeý jumysy jalǵasyp jatyr.
21 birlik «Jedel járdem» kóligi satyp alyndy. Jasandy ıntellekt kómegimen radıologııalyq zertteýlerdiń biryńǵaı derekter bazasy quryldy. Barlyǵy 333 birlik jabdyq satyp alyndy, onyń ishinde joǵary tehnologııalyq qural-jabdyq – robotty mıkroskop, 128 kesindi kompıýterlik tomografııa, angıograf apparattary bar.
О́ńirde aýyldaǵy medısınanyń damýyna mán berýdiń mańyzy zor. Bıyl Ulytaý aýdanynda jańa aýrýhana paıdalanýǵa beriledi. Jańaarqa aýdandyq aýrýhanasynda kúrdeli jóndeý jumysy júrgizilip jatyr. Shalǵaı eldi mekenderdegi jıyrma shaqty feldsherlik-akýsherlik, medısınalyq pýnktter, dárigerlik ambýlatorııalardy jańartý jumystary qolǵa alynǵan.
Salaǵa bilikti dárigerler tartý basty nazarda. Oblystyq bıýdjet esebinen medısına qyzmetkerlerin yntalandyrý, áleýmettik qoldaý sharalary kórsetiledi. О́ńirge kelgen 84 dárigerge kóterme járdemaqy tólendi. Onyń ishinde aýyldyq jerlerge kelgen 23 mamanǵa 8 mln teńgeden qarajat berildi. Oǵan qosa turǵyn úımen qamtamasyz etildi.
«2025 jyly oblystyq kópsalaly aýrýhanada kúrdeli jóndeý jumysy bastaldy. Aýrýhana úsh jyl ishinde tolyq jańartylady. Munda kardıologııa, gastroenterologııa, pýlmonologııa, revmatologııa, gospıtaldyq farmasııa sııaqty bes jańa bólimshe ashylady. Onkologııalyq aýrýlardyń aldyn alý, erte anyqtaý, emdeý jónindegi jumystar kúsheıtilip keledi. Eger úsh jyl buryn 20 tósektik bólimde nebári eki maman jumys istese, búginde jeti maman jumys isteıdi. Onkohırýrgtardy daıarlaý jónindegi jumystar da júrgiziledi. Bólimshe qajetti jabdyqpen tolyq jabdyqtalǵan. Sonymen qatar 100 tósektik oblystyq aýrýhananyń jańa ǵımaratyn salý arqyly bólimsheni keńeıtý josparda bar», dedi oblys ákimi Dastan Ryspekov.
Keńgir aýylyndaǵy 25 kereýettik jańadan salynǵan feldsherlik-dárigerlik ambýlatorııa «Aýylda densaýlyq saqtaýdy jańǵyrtý» ulttyq jobasy aıasynda salynyp, paıdalanýǵa berildi. «Aýyldyq densaýlyq saqtaýdy jańǵyrtý» qanatqaqty jobasynyń basty mindetteriniń biri – jetispeıtin medısınalyq-sanıtarlyq alǵashqy kómek uıymdaryn, atap aıtqanda, medısınalyq, feldsherlik-akýsherlik pýnktter, dárigerlik ambýlatorııalar salý arqyly barlyq aýyldyq eldi mekenderdi sapaly medısınalyq ınfraqurylymmen qamtamasyz etý. Ekinshi mindeti – aýyldyq densaýlyq saqtaý nysandaryn medısına kadrlarymen qamtamasyz etý. Demek, aýyldyq densaýlyq saqtaýdy jańǵyrtý isi halyqtyń ómir súrý uzaqtyǵyn, áleýmettik ál-aýqatyn arttyrýǵa septigin tıgizedi.
Jańadan ashylǵan dárigerlik ambýlatorııa aýyl turǵyndaryna alǵashqy medısınalyq kómekti sapaly ári der kezinde alýǵa múmkindik beredi. Ásirese analar men balalar densaýlyǵyn saqtaý, profılaktıkalyq jumystar júrgizý, aýyl turǵyndarynyń densaýlyǵyn baqylaýda ustaýǵa bul nysan asa qajet. Jańa ambýlatorııanyń alǵashqy medısınalyq kómek kórsetý kabınetteri, profılaktıkalyq tekserý bólmeleri, qoldanylatyn medısınalyq jabdyqtary talapqa saı.
Medısınalyq nysannyń qurylys jumysyn merdiger – «Astana premıým qurylys» JShS júrgizse, «Dostar qurylys toby» JShS tehnıkalyq qadaǵalaý jasady. Dárigerlik ambýlatorııa qurylysyna 416 mln 971 194 teńge qarajat jumsaldy. Medısınalyq nysan 2025 jyly Memleket basshysynyń tapsyrmasyn oryndaý maqsatynda elimizdiń Bas prokýratýrasy qaıtarǵan aktıvter esebinen salyndy. Densaýlyq saqtaý nysany táýligine 20-dan asa turǵynǵa qyzmet etedi. Sonymen qatar munda kúndizgi stasıonar jumys isteıdi, onda 10-ǵa jýyq em túri kórsetiledi. Densaýlyq salasynyń qyzmetkerlerine barlyq jaǵdaı jasalǵan. Keńgirlikter zamanaýı medısına jabdyǵynyń kómegine súıene alady.
Nysannyń ashylý saltanatynda óńir basshysy oblysta qaıtarylǵan aktıvter esebinen áleýmettik mańyzy bar nysandardyń kezeń-kezeńimen salynyp, halyq ıgiligine berilip jatqanyn atap ótti. Sondaı-aq júıeli jumystardyń júzege asýyna qoldaý kórsetken Bas prokýratýra men oblys prokýratýrasyna rızashylyǵyn bildirdi.
«Osy aýylda meıirbıke bolyp jumys istegenime 46 jyl boldy. Birtalaı qıyn baspaldaqtan óttik. Buryn otbasylyq dárigerlik ambýlatorııa ǵımaraty jekemenshik edi. Iesi satyp jibergen soń Jezqazǵan qalasynyń emhanasyna aýystyq. Odan keıin Keńgir aýyldyq okrýginiń ákimdigi óz ǵımaratynan tegin bólme berip, jeti jyl boıy jumysymyzdy sonda jalǵastyrdyq. Endi jańa medısınalyq ǵımarat ashylyp, qýanyp jatyrmyz», deıdi Gúlsim Altaeva.
Sóıtip, Keńgir aýylynda qaıtarylǵan aktıvter qarajaty esebinen salynǵan jańa dárigerlik ambýlatorııa endi halyq ıgiligine aınalady. Medısınalyq nysannyń ashylý saltanatynda Ulytaý oblysynyń ákimi Dastan Ryspekov pen Ulytaý oblysynyń prokýrory Jasulan Elamanov quttyqtaý sóz sóılep, Keńgir aýyldyq ardagerler keńesiniń múshesi Shaımuhambet Nurymov aq batasyn berdi.
Ulytaý oblysy
