PETROPAVL. 29 maýsym. Bıyl aqparat jáne baılanys qyzmetkerleriniń kásibı merekesi Qyzyljar óńirinde aıryqsha atap ótildi. Aıtýly data S. Muqanov atyndaǵy qazaq sazdy-drama teatrynda uıymdastyrylyp, eń tańdaýly qalam ıeleri marapattaldy. Bul týraly oblystyq ákimdiktiń baspasóz qyzmet habarlady.
«Tórtinshi bılik» ıeleri bas qosqan aıtýly sharaǵa aımaq basshysy Erik Sultanov arnaıy qatysyp, quttyqtady. Ol búgingideı jahandaný kezeńindegi baılanys pen aqparattyń mańyzyna toqtalyp, jaqsy jańalyqtardyń jarshysyna aınala berýge tilektestik bildirdi.
Alqaly basqosýda óńirdiń áleýmettik-ekonomıkalyq baǵdarlamalaryn júzege asyrýǵa belsene qatysqan respýblıkalyq, oblystyq, aýdandyq deńgeıdegi 30-ǵa jýyq sala qyzmetkerlerine oblys ákiminiń qurmet gramotalary men alǵys hattary jáne aqshalaı syılyqtary saltanatty túrde tabys etildi.
Bir top BAQ ókilderi Investısııalar jáne damý mınıstrligi baılanys, aqparattandyrý jáne aqparat komıtetiniń, Qazaqstan Jýrnalıster odaǵynyń marapattaryna ıe boldy.
«Ekspress K» respýblıkalyq gazetiniń menshikti tilshisi Elena Chernysheva «Jyldyń úzdik jýrnalısi», «24.kz» telearnasynyń jergilikti operatory Tólegen Imanov «Jyldyń úzdik operatory», «Dobryı vecher» gazetiniń shef-redaktory Dıana Slınkova «Jyldyń úzdik redaktory» atandy.
Saltanatty jıyn sońy konserttik baǵdarlamaǵa jalǵasty.
Mundaı qurmet qalalyq ákimdik, oblystyq sot, prokýratýra, ishki ister departamenti, áskerı ınstıtýt basshylyǵy tarapynan da kórsetildi.
О́mir Esqalı.
Derek, sýret: Soltústik Qazaqstan oblystyq ákimdiginiń baspasóz qyzmeti.
