QOSTANAI. 15 mamyr. Qostanaı oblysynyń Taran aýdanynda Reseıdiń Volgagrad oblysyndaǵy Kotelnıkov qalasyndaǵy baýyrlastar zıratynan topyraq salynǵan kapsýla ákelinip, qaıta jerlendi. Ondaǵy baýyrlastar zıratynda soǵys kezinde qaza tapqan jaýynger Sabyr Jumın da jatqan bolatyn. Bul týraly egemen.kz habarlady.
Bul ıgilikti iske Qostanaı oblysyndaǵy izshiler ekspedısııasy muryndyq boldy. О́tken jyldyń sáýir aıynda izshiler ırnternetten jerlesi Sabyr Jumınniń 1943 jyly Stalıngrad shaıqasynda qaza taýyp, Volgagrad oblysynda jerlengeni týraly aqparatty tapqan bolatyn. Sodan bastap jaýynger Sabyr Jumın týystarynyń otbasynda jaýynger atalarynyń aldyndaǵy paryzdy oryndaýdy maqsat tutqan jumystar bastalyp ketti.
Sabyr Jumınniń nemeresi Qarlyǵash Jumına: «Biz atamyz týraly izdeý jumystaryn osydan kóp jyldar buryn bastaǵanbyz. Úzbeı izdeýdiń arqasynda jaqynda ǵana atamyz týraly barlyq málimetti arhıvterden taptyq» dedi. Sabyr Jumınniń jerlengen baýyrlastar zıratyna baryp kelý jónindegi bastamany oblys ákimi Nuraly Sádýaqasov qoldady. Sonymen Volgograd oblysyna arasynda Jumınniń týystary bar delegasııa attanyp ketken bolatyn.
Qarlyǵash Jumına: «Kotelnıkov qalasynyń ákimshiligi bizdi jyly qabyldady, baýyrlastar zıratyna gúl shoqtaryn qoıdyq, sosyn olar bizge jaýyngerlik dańq oryndaryn aralatty. Baýyrlastar zıraty jaqsy kútilgen, sol úshin qala turǵyndaryna basymyzdy ıip qaıttyq. Soǵystaǵy erlik te, eshkim de umytylmaıdy» dedi.
Delegasııa baýyrlastar zıratynan bir kapsýla topyraq aldy, sonymen qatar Sabyr Jumınniń týǵan jerinen de bir ýys topyraq aparyp saldy. Sóıtip jaýyngerdiń jatqan jerinen alynǵan topyraqty onyń týǵan jeri Taran aýdanyndaǵy Naberejnyı aýylyndaǵy zıratqa ákelip jerledi. Zıratttyń basyna jaýyngerge arnalǵan eskertkish belgi ornatyldy. Uly Otan soǵysynda mıllıondaǵan adam qaza tapty, kóptegen jaýyngerler habarsyz ketti. Sol habarsyz ketkenderdiń biri Sabyr Jumın bolatyn, endi onyń rýhy týǵan jerine, eline kelip tynystady.
Názıra Járimbetova.
Derek, sýret: egemen.kz
