Jetisýda jel elektr stansasy salynady

Jobanyń jalpy quny 215 mln dollardy qu­raıdy. Inves­tısııalyq bas­tama aıasyn­da zamanaýı joǵary tehnologııalyq jel generatorlary men energııa jınaqtaý júıeleri ornatylǵan elektr stansasyn salý kózdelip otyr. Bul nysan óńirdiń energetıkalyq áleýetin arttyryp qana qoımaı, elimizdiń «jasyl ekonomıkaǵa» kóshý saıasatyna da óz úlesin qospaq.

Kezdesý barysynda «Envision Energy» kompanııasynyń aǵa vıse-prezıdenti Veı Veı kom­panııanyń jańartylatyn energetıka salasyndaǵy tájirıbesi týraly aıtyp ótti. Onyń sózin­she, kompanııa álemdik naryqta «aqyldy» jel týrbınalary men energııa saqtaý júıelerin óndi­rýmen aty shyqqan.

«Jobanyń jyldyq elektr energııasyn óndirý kólemi 3200 saǵattan asady dep boljap otyrmyz. Bul óńirdiń energetıkalyq turaqtylyǵyn qamtamasyz etýge jáne elektr energııasyn óndirý kólemin arttyrýǵa múmkindik beredi. Sonymen qatar zamanaýı energııa jınaqtaý júıeleri jeldiń turaqsyzdyǵyna baılanysty týyndaıtyn táýekelderdi azaıtady», dedi Veı Veı.

Sarapshylardyń pikirinshe, mundaı jobalardyń mańyzy jyldan-jylǵa artyp keledi. Birinshiden, jel energetıkasy atmosferaǵa zııandy qaldyqtar shyǵarmaıdy. Ekinshiden, óńirdiń elektr energııasyna degen suranysyn qamtamasyz etýge kómektesedi. Úshinshiden, qurylys jáne paıdalaný kezeń­de­rinde jańa jumys oryndary ashylady. Sondaı-aq ınfra­qu­rylymnyń damýyna jáne jergilikti bıýdjetke túsetin túsim­derdiń artýyna oń áser etedi.

Jetisý oblysy jańarty­la­tyn energııa kózderin damytýda tájirıbesi bar óńirlerdiń qataryna kiredi. Buǵan deıin óńir aýmaǵynda birqatar sý jáne kún elektr stansalary iske qosylǵan. Ásirese oblys aýmaǵyndaǵy tabıǵı-klımattyq jaǵdaılar – turaqty jel aǵyndary, kún radıasııasynyń joǵary deńgeıi men sý resýrstarynyń bolýy jańartylatyn energııa jobalaryn damytýǵa qolaıly múmkindik beredi. Sondyqtan jańa jel elektr stansasynyń salynýy óńirdegi balamaly energetıkanyń úlesin arttyrýǵa baǵyttalǵan kezekti mańyzdy qadam retinde baǵalanyp otyr.

Kezdesý qorytyndysynda oblys ákimi jobanyń óńir úshin ózekti ekenine erekshe toqtaldy.

«Energetıka – oblysymyzdy damytýdyń negizgi baǵyt­ta­rynyń biri. Sondyqtan jańar­ty­latyn energııa kózderin da­my­týǵa baǵyttalǵan jobalar, onyń ishinde jel elektr stansalaryn salý jobasy biz úshin asa mańyzdy. Osyǵan baılanysty jobaǵa qoldanystaǵy zań­nama aıasynda qajetti qoldaý kór­se­ti­le­di», dedi oblys ákimi.

Jetisý oblysy