Jıyn barysynda ekologııalyq túıtkilderdi sheshetin ınnovasııalyq jobalar, onyń ishinde jasandy ıntellekt tehnologııalaryn qoldanýǵa negizdelgen jumys tanystyryldy. Sonymen qatar jańartylatyn energetıka men ınjenerlik ekologııa salasyndaǵy halyqaralyq yntymaqtastyqty damytý jáne birlesken zertteý jobalaryn júzege asyrý jaıy talqylandy.
Hımııa kafedrasynyń meńgerýshisi Eldar Kopıshevtiń aıtýynsha, qoǵamdy tabıǵı qorlardy sarqymaı energııamen qamtamasyz etý, qaldyqtardy qundy resýrsqa aınaldyryp, tutynýdyń syzyqtyq modelinen aınalym ekonomıkasyna kóshý búgingi kúnniń mańyzdy mindetine aınalyp otyr.
«Qazir ǵalymdar turaqty energetıkalyq júıelerde jasandy ıntellektini qoldaný, ekologııalyq basqarý men ekojúıelerdi saqtaý, resýrstardy qalpyna keltirý, tabıǵı qorlardy ornyqty basqarý máselesin zerdelep jatyr. Rasynda, ǵylym adamǵa ǵana emes, ǵalamsharǵa da qyzmet etýge tıis», dedi E.Kopıshev.
Birikken Arab Ámirlikterindegi Joǵary tehnologııalar kolledjiniń ǵalymy Asım Omarı jańartylatyn energııa kózderin tıimdi basqarý úshin jel jyldamdyǵyn boljaýǵa arnalǵan zertteý nátıjelerimen bólisti.
«Zertteý aýyl sharýashylyǵynda neǵurlym sapaly sheshim qabyldaýǵa, qoldanystaǵy júıelerdi ońtaılandyrýǵa múmkindik beredi. Mysaly, jel týrbınalarynyń jumysyn jetildirýge, energetıkalyq júıelerdiń tıimdiligin arttyrýǵa, agrarlyq josparlaýdy jaqsartýǵa yqpal etedi. Munyń bári el ekonomıkasyna, basqa da kóptegen salalǵa oń áserin tıgizedi», dedi sheteldik zertteýshi.
Jıynda sondaı-aq, jańartylatyn energııa kózderin baqylaýǵa arnalǵan mashınalyq oqytý tehnologııasy, munaı óńdeý salasyndaǵy sıfrlyq platformalardy paıdalaný, plastık qaldyqtaryn qaıta óńdeý, «jasyl» sýtegi óndirý, sondaı-aq qaıtalama shıkizattan sırek kezdesetin jáne platına tobyna jatatyn metaldardy alý baǵytyndaǵy ınnovasııalyq jobalar tanystyryldy.
Konferensııa jumysy úsh seksııa boıynsha uıymdastyryldy. Birinde turaqty energetıkalyq júıeler men jasandy ıntellekt sheshimderi talqylandy.
Zarına TAILAQ,
L.N.Gýmılev atyndaǵy EUÝ stýdenti
