ASTANA. 4 naýryz. VTB Biryńǵaı lıgasynda oınaıtyn «Astana» basketbol komandasy óz alańynda Samaranyń «Krasnye Krylıasyn» 95:88 esebimen jeńdi. Bul týraly egemen.kz habarlady.
Oıynda alǵash bolyp upaı enshilegen «Astana» birinshi kezeńdi óz paıdasyna aıaqtady.
Degenmen, qonaqtar basqa kezeńderden góri dál osy shırekte aıtarlyqtaı qarsylyq kórsetti. Tipti kezeńniń orta tusynan aýa bergende samaralyqtar 8 upaı basymdyǵymen alǵa shyqty. Áıtse de, olar úziliske deıin bul basymdyqty ustap tura almady.
Oıynnyń qalǵan úsh kezeńinde «Krasnye Krylıa» komandasynyń oıynshylary tek esep aıyrmasyn qysqartýmen ǵana ýaqyt ótkizdi. Tartystyń úshinshi kezeńinde «Astana» 74:56 esebimen alǵa shyǵyp, upaı basymdyǵyn 18-ge deıin arttyrdy. Alaıda, tórtinshi kezeńde qonaqtardyń oıynyna qan júgirip, eki komanda arasyndaǵy esep 4 upaıǵa deıin qysqardy. «Astanany» jattyqtyratyn lıtvalyq maman Ramýnas Býtaýtas dereý komandasynyń oıyn órnegine ózgeris engizdi. Nátıjesinde, elordalyqtar kezdesý sońyna deıin jeńis esebin saqtap qala aldy. Soǵan qaramastan tartys sońyndaǵy baspasóz máslıhatynda Býtaýtas myrza shákirtteriniń oıynyna kóńili tolmaǵanyn aıtty.
Kezdesý barysynda eń kóp upaı jınaǵan oıynshy «Krasnye Krylıa» sapyndaǵy Vıktor Zarıajko. Ol 40 mınýttyń ishinde enshisine 25 upaı jazǵan eken. Al «Astana» komandasynan Djerrı Djonson úzdik atandy. Djerrı óz komandasynyń paıdasyna 20 upaı oljalady.
Osy jeńisinen keıin «Astana» VTB lıgasynyń týrnır kestesinde 9-orynǵa jaıǵasty. Saıystyń pleı-off kezeńine úzdik segiz komanda shyǵatyny belgili. Astanalyqtar lıga aıasyndaǵy kelesi oıyndy 8 naýryz kúni óz alańynda «Nıjnıı Novgorodqa» qarsy ótkizedi. Bul komanda búginde týrnır kestesinde 4-satyda keledi. Sondaı-aq, bul «Astananyń» qatarynan úshinshi jeńisi ekenin de aıta keteıik. Osyǵan deıin Estonııanyń "Kalev" komandasy men Saratovtyń "Avtodorynan" basym túsken bolatyn.
Elaman Qońyr.
Derek: egemen.kz
Sýret: bcastana.kz.
