Kókshetaýda jesirlerge qurmet kórsetildi

KО́KShETAÝ. 21 tamyz. Kókshetaýdyń «Toıhana» atalatyn dámhanasynda jaqsy bir otyrys boldy. Munda jesirlerge qurmet kórsetildi. Bul týraly egemen.kz tilshisi habarlady. Bastamany ózimiz kópten biletin syıly aǵamyz Sıtzııa Baımanov, Dolomıt kentiniń ákimi bolǵan Jumabek Júkenov, osynda sońǵy kúnge deıin jumys istegen Janbatyr Janseıitov kótergen eken. Sıtzııa aǵa 1974 jyly qurylyp, 1996 jyly tarap ketken Kókshetaý oblystyq mal sanıtarlyq otrıadyn basqarǵan edi. Bul mekemedegi 70 maman óńirdiń barlyq sharýashylyqtaryna qyzmet kórsetti, óńirlik damýǵa salmaqty úlesterin qosty. Kásibine adal jandardyń esimi el aýzynda áli kúnge qurmetpen atalady. О́mir úrdisindegi kósh kerýende toqtam joq. Tirshilik zańy «sanotrıadtyń» sapyn da sıreksitip qalypty. Biraq, birge júrgen kúnder umytylmaq emes. Áý bastan bastalǵan syılastyqtyń uzaǵynan bolǵanyna ne jetsin. «Toıhanadaǵy» erekshe jıynǵa qaıtys bolǵan alty aǵamyzdyń jesirleri jınaldy. Olarǵa el aýzyndaǵy «jetpistiń» jigitteri quraq ushyp qyzmet kórsetti. Naýan Haziret atyndaǵy ortalyq meshittiń naıb ımamy Serik quran baǵyshtap, jasy úlken vetvrach Jumabek Júkenov bata berdi. Qajymuqan Batqalovtyń eske alý sózi júrekterdi tolqytty. Tórde otyrǵan apalardyń atynan Shaımar Seralın men Bota Zıkenovtiń jesirleri Zaıra jáne Kúlzııa analar tebirenisti alǵys sezimderin jetkizdi. Onda ujymdyq yntymaq pen syılastyq, tárbıelik tartylys, urpaqqa ónege máseleleri keńinen qamtyldy. Baqbergen Amalbek. Derek, sýret: egemen.kz