Italııada alǵash ret ebola vırýsyn juqtyrǵan azamat anyqtaldy

ASTANA. 18 mamyr. Dúnıejúzilik densaýlyq saqtaý uıymyna Italııada ebola vırýsyn juqtyrǵan adam týraly derek kelip tústi. Mundaı jaıt atalǵan elde alǵash ret tirkelip otyr. Bul týraly 24today.net habarlady. Birikken Ulttar Uıymy aqparat ortalyǵynyń habarlaýynsha, qaterli derttiń belgileri jaqynda ǵana Serra-Leoneden oralǵan dáriger mamannan anyqtalǵan. Ol Afrıkada osy indetke shaldyqqandardy emdegen. Italııa azamaty Serra-Leone astanasy – Frıtaýnnan Kasablanka arqyly kelgen. Ol Rımge 7 mamyrda oraldy. Al vırýstyń alǵashqy belgileri 72 saǵattan keıin, ıaǵnı, 10 mamyrda anyqtalǵan. Bastapqyda dárigerdi Sardınııadaǵy aýrýhanalardyń birine jatqyzady. Eki kún ótken soń ony Rımdegi juqpaly aýrýlar ulttyq ınstıtýtyna jiberdi. Aýrýdyń belgileri 72 saǵattan keıin anyqtalǵandyqtan, mamandar Italııa azamatymen birge ushaqta ushqan jolaýshylarǵa eshqandaı qaýip tónip turmaǵanyn aıtýda. Dúnıejúzilik densaýlyq saqtaý uıymynyń derekteri boıynsha, búginge deıin ebola vırýsynan Gvıneıa, Lıberııa jáne Serra-Leone elderinde 11 005 adam qaza tapqan. Odan bólek, 26 593 adam atalǵan dertti juqtyrdy. Aýrýdyń alǵashqy belgileri: dene ystyǵynyń kóterilýi, sandyraqtaý jáne as qorytý júıesiniń buzylýy. Derttiń qaýiptiligi sonshalyq, alǵashynda juqtyrǵandardyń 90 paıyzy qaza tapty. Qazirgi kezde bul kórsetkish 55 paıyzdy quraıdy. Elaman Qońyr. Derek, sýret: 24today.net.