Memlekettik hatshy halyqaralyq dzıýdo federasııasy prezıdentimen kezdesti

ASTANA. 22 tamyz. Memlekettik hatshy Gúlshara Ábdiqalyqova halyqaralyq dzıýdo federasııasynyń prezıdenti Marıýs Vızermen kezdesti. Bul týraly akorda.kz habarlady. Kezdesý barysynda Qazaqstannyń halyqaralyq dzıýdo federasııasymen aradaǵy ózara is-qımylynyń ózekti máseleleri jáne sporttyń osy túrin respýblıkamyzda damytý perspektıvalary talqylandy. Memlekettik hatshy kelesi álem chempıonatyn ótkizýshi el retinde Qazaqstanǵa tańdaý jasaǵany úshin federasııaǵaa rızashylyǵyn bildirdi. Chempıonat 2015 jylǵy 24-30 tamyz aralyǵynda Astanada ótetin bolady. G.Ábdiqalyqova Memleket basshysynyń dene tárbıesine, buqaralyq sportqa jáne joǵary jetistikterge jetkizetin sport túrlerine aıryqsha mán beretinin atap ótti. Búginde Qazaqstanda halyqaralyq talaptarǵa saı sporttyq nysandar boı kóterip, álemdik deńgeıdegi sport sharalary ótkizilýde. Dzıýdo respýblıkadaǵy eń tanymal sport túriniń biri bolyp sanalady, onymen 80 myńnan astam qazaqstandyq turaqty aınalysady. Sportshylardyń sheberligin jetildirý maqsatynda barlyq qajetti jaǵdaı jasalǵan. Máselen, búginde Qazaqstanda eldiń qurama komandalary jattyǵý sharalaryn ótkizetin, sporttyq jekpe-jek jáne kúsh qoldanylatyn sport túrleri konfederasııasy akkredıttegen 15 sporttyq baza bar. Táýelsizdik jyldary dzıýdoshylarymyz olımpıada oıyndarynda 1 kúmis medal, álem chempıonattarynda 1 altyn, 2 kúmis, 3 qola medal, Azııa oıyndarynda 1 altyn, 10 kúmis jáne 21 qola, Azııa chempıonattarynda 4 altyn, 6 kúmis jáne 30 qola medal ıelendi. Aldaǵy álem chempıonatynda Qazaqstan sportshylary jeńis tuǵyrynyń joǵary oryndaryn ıelený úshin saıysqa túsetin bolady. Álemdik birinshilikke dúnıe júziniń 140 elinen 900-den astam sportshy qatysady jáne erler men áıelder arasynda 7 salmaq dárejesi boıynsha 14 medal jıyntyǵy sarapqa salynady. Aıdar О́risbaev. Derek, sýret: akorda.kz.