Velosport. «Výelta» kópkúndiginiń 1-kezeńinde Astana 13-orynnan kórindi

ASTANA. 23 tamyz. Keshe velosporttan Výelta kópkúndigi bastaldy. Ispanııada ótip jatqan saıystyń alǵashqy kezeńinde qatysýshylar komandalyq synda sheberlik baıqasty. Bul týraly egemen.kz habarlady. Dodada el namysyn qorǵaıtyn Astana pro team kásibı velokomandasy birinshi kezeńdi 13-orynmen aıaqtady. Alaıda, bul nátıje velosportshylardyń jeke kórsetkishterine áser etpeıtini belgili. Sondyqtan naǵyz tartys búgin bastalady deýge tolyq negiz bar. Ekinshi kezeńde atletter Alaýrın-de-la-Torre men Kamınıto-del-Reı eldimekenderiniń arasyn jalǵaǵan 158,7 shaqyrymdyq jarys jolyn júrip ótedi. Birinshi kezeńdegi komandalyq synda qatysýshylar 7,4 shaqyrymǵa sozylǵan Pýerto Banýsý men Marbelı arasyndaǵy joldy basyp ótti. Nátıjesinde BMC velokomandasy top jardy (8 mınýt 10 sekýnd). Dál osyndaı kórsetkishke ıe Tinkoff-Saxo jáne Orica-Green Edge komandalary tıisinshe ekinshi, úshinshi oryndarǵa jaıǵasty. Al 13-orynnan kóringen Astana jeńimpazdan 30 sekýndqa qalyp qoıdy. Osy saıysta bizdiń komandanyń sapynda Vınchenso Nıbalı, Fabıo Arý jáne Mıkel Landa syndy myqtylar bar ekenin erekshe atap ótken jón. Sondyqtan jalpy esepte top jarýǵa tolyq múmkindik bar. Jarys 13 qyrkúıekte aıaqtalady. Elaman Qońyr. Derek: egemen.kz. Sýret: sport-xl.org.