Testileý tártibinde nendeı ózgeris?

Balalardyń bilim dárejesin testileýmen anyqtap, olardyń bolashaǵyna baǵdar beretin UBT óz deńgeıinde jyl saıyn artyqshylyqtary jáne kemshilikterimen ótip keledi. Bul turǵyda laıyqty balldy jınaı almaı, keleshekke senimsiz qaraı bastaǵan oqýshylardyń psıhologııasyna salmaq bolar bilim júıesine bıylǵy jyly biraz ózgerister engendigin bildik. Atalǵan taqyryp tóńi­reginde, biryńǵaı testileýge bir aı shamasynda ýaqyt qal­ǵan kezde Bilim jáne ǵylym mınıstrligi tarapynan birqatar málimetter berildi. Prezıdent janyndaǵy Ortalyq kommýnıkasııalar qyzmetinde bas qosqan mınıstrlik ókilderi aǵymdaǵy jyldyń jańalyqtarymen tanystyrdy. Ústimizdegi jyldan bastap kámelettik attestatqa UBT men pán boıynsha jyldyq baǵa­nyń qorytyndysy ortasha arıfmetıkalyq jıynty­ǵyndaǵy quramdyq baǵamen anyqtalatyn bolady, dedi Bilim jáne ǵylym mınıstrligi Bilim jáne ǵylym salasyndaǵy baqylaý komıtetiniń tóraǵasy Saıat Núsipov. Mundaı attestattaý mekteptiń ju­my­syn ádil baǵalaýǵa, mektep bitirýshilerge túsetin psı­ho­emosıonaldyq júktemeni azaıtýǵa mol múm­kindik bere­tinin aıtqan S.Núsipov mektepte úzdik oqy­ǵan oqýshy testileý kezinde psı­hologııalyq nemese basqa da jaǵdaılarǵa baı­lanysty tómen ball alyp qalýy múmkin ekendigin, osy tur­ǵyda attes­tatqa onyń testi­leýden jınaǵan baǵasy túse­tindigin mysalǵa keltire otyryp, osy júıeniń qazirgi tańda ózgergendigin tar­qatyp aıtty. Baǵanyń arıf­metıkalyq jıyntyǵy dep otyrǵanymyz da tap osy, degen komıtet tóra­ǵasy, 5-ke oqyǵan balanyń tes­ti­den 4 alyp qalatyn jaǵ­daıynda, onyń orta kórsetkishi 4,5 bolatyndyǵyn tilge tıek etti. Sonymen qatar, ol elimizdegi jalpy sany 155-ti quraıtyn test ótkizý pýnktterine taǵy da 10 pýnkt qosylǵandyǵyn aıtty. Bul máseleniń tasasynda balalardyń ártaraptan avtobýsqa minip, birshama jol júrip, testileý pýnktine sharshap jáne tolqyp baratyndyǵy sebep ekendigin jetkizdi. Sol sebepti de, shalǵaı óńirlerde qosymsha pýnktter ashylǵan. Sondaı-aq, lekter sanynyń ulǵaıýy jáne olardaǵy testi­lenýshiler sanynyń 600-ge deıin kemýi esebinen, UBT ótkizý merzimi 2 aptaǵa uzartyl­ǵandyǵyn atap ótti. Salys­tyrmaly túrde ótken jyly UBT merzimi bir aptany qurap, lektegi bilim alýshylar sany 800-ge barǵan. UBT ótkizý pýnktterine, test ótkizýdi basqarý jáne baqylaý úshin 2000 mınıstrlik ókilderi taǵaıyndaldy. Olar ár aýdıtorııaǵa bireýden qaty­sady. Bul tehnıkalyq qural­dardyń úzdiksiz jumys ja­saýyn qadaǵalaý úshin de tıimdi, dedi S.Núsipov. Sony­men qatar, onyń aıtýyna qaraǵanda, jasóspirimderdiń psıho­logııalyq jas erekshe­ligin esepke ala otyryp, mek­tep bitirýshiler men olardyń ata-analarynyń qaýip­siz­digin qamtamasyz etý jáne kúı­zelisin barynsha azaıtý úshin kópshiliktiń nazary­na usynylatyn UBT qorytyn­dy­syna shartty belgi qoıy­lady. Iаǵnı, burynǵy dástúr bo­ı­ynsha testileýden soń onyń qorytyndysy aty-jóni ja­zylyp, taqtaıshaǵa ilinbeı­di. Ár oqýshyǵa jeke sáıkes­tendirý nómiri jáne testile­ný­shiniń jeke kody beriledi. Ol bitirýshiniń aty-jóniniń orny­na jazylady. UBT qorytyn­dysy bir ýaqytta Ulttyq testileý ortalyǵynyń www.testcenter.kz saıtynda jarııalanatyn bolady. Balalardyń psıhologııalyq ahýaly basty nazarda jáne olardyń keleshekke degen se­nim­di qadamy mańyzdy eken­digin aıta otyryp, S.Núsi­pov osynyń aıasynda ata-analar men mektep muǵalimderiniń balaǵa qoldaý kórsetý qajettigin kóldeneń tartty. Elmıra MÁTIBAEVA, «Egemen Qazaqstan».