Petropavlda 200 qańǵybasqa járdem kórsetildi

PETROPAVL. 5 naýryz. Petropavlda jergilikti polıseıler «Bomj» operasııasynyń alǵashqy kúni úısiz-kúısiz, dala kezip júrgen eki júzge jýyq adamdy tıisti orynǵa jetkizip, járdem kórsetti. Bul týraly qalalyq ishki ister basqarmasy habarlady. Qabyldaý-bólý ortalyǵy basshysynyń orynbasary Rýslan Álibaevtyń aıtýynsha, ne jumys, ne baspana joq, áıteýir súıretilip, ólmeshiniń kúnin kórip júrgen bul sanattaǵylardyń arasynda qylmysqa urynýshylardyń sany az kórinbeıdi. Oǵan jyl basynan 80-ge jýyq tártip buzýshylyqtyń, onyń ishinde 6 qylmystyń jasalǵany dálel. Qabyldaý-bólim ortalyǵyna ákelingen qańǵybas adamdardyń 68-inde tıisti qujattary bolmaı shyqqan. Aralarynda áıelder de bar. Endi olar medısınalyq tekserilýden ótkennen keıin kim ekendikteri naqtylanǵansha 30 kúnge deıin arnaıy baqylaýda ustalynatyn bolady. 54 jastaǵy bir kezbeni polısııa qyzmetkerleri jylý trassasy janynan ash-jalańash kúıinde keziktiripti. Bir kezderi táp-táýir jumys atqarǵan ol otbasydaǵy kıkiljińniń saldarynan araqqaqa salynǵan. Bala-shaǵadan aıyrylǵan soń qańǵybastar qataryna qosylǵan. Sońynda adam tózbes keıipke engen. «Aýyldyq jerde kúneltý qıynǵa soqqandyqtan oblys ortalyǵyna kelgen edim. Munda da tirligim ońalyp kete qoıǵan joq. Jumys izdep kórdim. Túrime qarap eshkim qabyldamaıdy. Ortalyqta jaqsy tamaqtandyrady. Jýynyp-tazalanyp, ál jıyp alǵannan keıin taǵy jumys izdep kóremin», deıdi N. esimdi azamat. О́mir Esqalı. Derek: Petropavl qalalyq ishki ister basqarmasy. Sýret: news.nur.kz.