Batys Qazaqstanda orynsyz jumsalǵan qarajat qaıtaryldy

ORAL. 5 naýryz. Batys Qazaqstan oblysynda memlekettik satyp alý zańdylyqtarynyń belden basylý kórinisteri kezdesip qalyp júr. Bul týraly egemen.kz tilshisi habarlady. Osyndaı jaǵdaı jaqynda shalǵaıdaǵy Qaratóbe aýdanynda tirkeldi. Munda prokýratýra organdary bıýdjet qarajatynyń negizsiz, shekten tys artyq jumsalý kórinisterin anyqtady. Batys Qazaqstan oblystyq prokýratýrasynyń baspasóz qyzmetinen túsken málimet ótken jyldyń 15 qyrkúıeginde Qaratóbe aýdandyq bilim berý bólimi et ónimderin bilim ordalaryna jetkizý jóninde «Talapker» sharýa qojalyǵymen kelisimshart jasaǵanyn aıǵaqtaıdy. Bul kezde ettiń ár kılosy úshin 900 teńge baǵa belgilengen. Tıisti normatıvter men talaptar boıynsha bıylǵy jyldyń basynda atalǵan kelisimshart uzartylýǵa tıisti bolatyn. Alaıda, bul tártip oryndalmaǵan. Dál osy arada memlekettik satyp alý jónindegi zańnama buzylyp, endigi jerde ettiń ár kılosyn 1200 teńgeden jetkizý jóninde qosymsha kelisimshart jasalǵan. Sóz joq bul naqty baǵadan áldeqaıda joǵary, negizsiz ári kóterińki baǵa bolatyn. Prokýrorlyq yqpal etý sharalarynyń nátıjesinde qosymsha kelisimsharttyń kúshi joıyldy. Osy ýaqyttyń ishinde aýdandyq bilim berý bólimi «Talapkerge» 132 mıllıon 600 teńgeni negizsiz tólegen. Osy somanyń bári bıýdjetke keri qaıtarylyp alyndy. Buǵan qosa 862 mıllıon teńge bıýdjettik qarajatty únemdeý múmkindigi týdy. Temir Qusaıyn. Derek: egemen.kz. Sýret: news.nur.kz.