«Atameken» Ulttyq kásipkerler palatasynyń basqarma tóraǵasy Abylaı Myrzahmetov: «Bıznesti básekege úıretedi»

Keshe Prezıdent janyndaǵy Ortalyq kommýnıkasııalar qyzmetinde  ótken kezekti baspasóz máslıhatyna «Atameken» Ulttyq kásipkerler palatasynyń basqarma tóraǵasy Abylaı Myrzahmetov qatysty. Baspasóz máslıhatynda áńgime ózegi teńge baǵamynyń tómendeýi tóńireginde órbidi. Árıne, qazirgi jaǵdaı kim-kimge de ońaı tıip otyrǵan joq. Dollar baǵasynyń qubylmaly jaǵdaıy qarapaıym halyqty bylaı qoıǵanda, kásipker qaýymdy biraz kúpti kóńilge salǵany shyndyq. Sebebi, Úkimetpen qatar jeke kásipkerlerdiń al­dynda da dál osyndaı qıyndaý shaqta zor jaýapkershilik júgi turǵany anyq. О́ıtkeni, teńge baǵamyn tómendetýdegi túrtki bolǵan bir sebep osy kásipkerlerge taıanǵan tyǵyryqtan shyǵýdyń joly bolatyn. Árıne, ýaqyt talabynan týǵan májbúrli sheshim osy. Iá, Abylaı Myrzahmetov teńge baǵamynyń tómendeýi otandyq bıznestiń básekege qabilettiligin kóterýge, qosymsha túsim alýǵa, eń bastysy, jumys oryndaryn saqtap qalýǵa múmkindik beretini týraly buǵan deıin de aıtqan bolatyn. UKP basqarma tóraǵasy bul teńge qunyn tómendetý qajettiginiń uzaq taldaý­dan ótip, talqyǵa túskenin aıt­qan. «Eksportshylar qoldady, al shaǵyn jáne orta bızneste keıbir salalardyń keı dúnıelerden aıyrylyp qalýy múm­kin degen qaýip boldy. Sebebi, bireýde valıý­talyq kredıt bar, valıýtalyq túsimi joq degendeı. Bul jaǵdaıdy da taldaýdan ótkizdik, júginýine bolatyn jedel shtab qurdyq. Apta saıyn derlik Úkimet basshylyǵymen, barlyq mınıstrlermen baılanysta boldyq, bul aqparatty jet­kizip, birge talqyladyq. Osy jartyjyl­dyqta jaǵdaı nasharlaı bastady. ShOB ba­ǵam túzetilý qajettigine tap boldy. Sondyqtan, teńge baǵamyna qatysty she­shimdi bıznes ókilderi qoldaıtynyn jetkizdi, dedi ol. Brıfıng barysynda Abylaı Myr­zahmetov teńge baǵamynyń ózgerisi sátinde kásipkerlerge qatysty qandaı sharalar qabyldanatynyn áńgimeledi. Sondaı-aq, taýar baǵasyn turaqty ustap turýǵa qatysty mysaldar aıtyldy. Sonymen qatar, A.Myrzahmetov halyqqa qajetti áleýmettik taýarlar qunyn naryqtyq jolmen qadaǵalaý qajettigin atap ótti. Reseımen ortaq naryqta bolǵannan keıin, ásirese, tamaq ónerkásibi salalaryndaǵy báse­kelestik sharalary birdeı bolýy tıis. Máselen, teńge baǵamy erkin aınalymǵa jiberilgenge deıin reseılik taýardyń qazaqstandyq taýardan ortasha quny 30 paıyzǵa qymbat bolǵan. Biraq qazirgi ýaqytta bizdiń taýarlardyń baǵasyn olarmen birden teńestirýge bolmaıdy. «Ony birden 100 paıyz reseılik taýar qunymen birdeı qylaıyq degen saıasat joq. Ol menińshe, durys emes. Odan ke­ıin Elbasymyz eshkimge de otandyq taýar qunyn kótermeý kerek degen maqsat júk­tegen joq. Memleket basshysynyń jal­py aıtqany, otandyq kásipkerlerdiń tutynýshylardyń, qoǵamnyń aldyndaǵy áleý­mettik jaýapkershiligin sezinýi. Iаǵnı, baǵany kúrt ósirmeý. Eger taýaryńyz ım­port bolsa, onda kóterýge bolady. Biraq ımport ákeletin saýda uıymdarynyń, ne bol­masa kompanııanyń óz qoımasynda bir aılyq eski baǵamen ákelgen taýary bola­dy. Sondyqtan birden taýar baǵasyn kó­terý bıznestiń halyq aldyndaǵy áleý­mettik jaýapkershiligine jatpaıdy»,  dedi ol. Árıne, memleket óz tarapynan ne­gizgi halyqqa qajetti áleýmettik taýarlarǵa qadaǵalaý jasaıdy. Biraq onyń da naryqtyq jáne ákimshilik joly bar. «Bizdińshe, naryqtyń jolyn tańdaǵan jón. Biz jyl saıyn osyndaı jaǵdaı bolǵanda ákimshilik joldy iske qosamyz. Ákimdikter bazarlardy, dúkenderdi aralap, baǵany kóterme dep aıtady. Menińshe, bul naryqtyq saıasatqa jatpaıdy»,  dedi basqarma tóraǵasy. Sondyqtan halyqqa qajetti áleýmettik taýarlar qunyn naryqtyq jolmen qadaǵalaý qajet. Dınara BITIKOVA, «Egemen Qazaqstan».