Astana kúnine aıtýly syılyq bolyp tartyldy
Astana kúniniń qarsańynda Elbasy Nursultan Nazarbaevtyń «О́mir ótkelderi» atty taǵy bir tamasha kitaby ómirge keldi. Roman-dıalog tájirıbesi qazaq ádebıetiniń tarıhynda burynnan bar ekenin bilemiz. Álemdik tájirıbede saıası qaıratker ómirin suhbat túrinde jazǵan úlginiń biri retinde Fıdel Kastronyń jeke ómiri qamtylyp, álemniń jıyrmadan astam tiline aýdarylǵan «Moıa jızn» atty (M., 2009) kitabyn mysalǵa alýǵa bolady. Myna eńbek te osy ádispen jazylǵan.
Keshe Qazaqstan Respýblıkasynyń Tuńǵysh Prezıdenti – Elbasynyń kitaphanasynda osy kitaptyń tusaýkeser rásimi boldy. Oǵan elimizge tanymal memleket jáne qoǵam qaıratkerleri, Parlament depýtattary, aqyn-jazýshylar, ǵalymdar qatysty. Jıyndy Prezıdent Keńsesiniń bastyǵy – atalǵan mekeme dırektorynyń mindetin atqarýshy Mahmut Qasymbekov ashyp, tusaýkeserdegi alǵashqy sózdi Memlekettik hatshy Gúlshara Ábdiqalyqovaǵa berdi.
Gúlshara Naýshaqyzy óz sózin táýelsiz elimizdiń Tuńǵysh Prezıdenti, álemdik deńgeıdegi birtýar tulǵa, Elbasy Nursultan Nazarbaevtyń shyǵarmalar qatary búgin mazmuny tereń jańa týyndymen tolyǵyp otyr, dep bastady. «О́mir ótkelderi» atty kitap el Prezıdentiniń elimiz táýelsizdik alǵan 1991 jyldan keıin ózi týraly áńgimelegen ekinshi kitaby deýge bolatynyn atap ótti. Odan ári Memlekettik hatshy Nursultan Nazarbaevtyń ómiri men qyzmeti týraly buǵan deıin de birneshe otandyq jáne sheteldik avtorlardyń qalam terbegenin jetkizdi. Sonyń ishinde tanymal kósemsózshiler Roı Medvedev, Djonatan Aıtken jáne t.b. bar. Al jýyrda «Álemdik kóshbasshylar» serııasyn ashyp, belgili orys jazýshysy Sergeı Plehanovtyń «Jibekteı esilmegen jol» atty kitaby jaryq kórdi. Memleket basshysynyń suhbattarynan turatyn búgin tusaýy kesilip otyrǵan «О́mir ótkelderi» kitaby el ómiriniń kúrdeli kezeńderine jeke óz basynyń kózqarasyn bildirip, baǵasyn berýimen qundy. Sonymen qatar, onda táýelsiz eldi qurý men damytý barysyndaǵy taǵdyrsheshti sheshimderdiń týýy men oryndalýy baıandalǵan, dedi G.Ábdiqalyqova.
Atalǵan shyǵarmanyń qundylyǵy týraly jeke pikirimdi aıtsam, Elbasy men suhbat alýshy arasyndaǵy tabıǵı shynaıy áńgimeniń órbýi, egemendik shejiresine qatysty buryn-sońdy estimegen tyń derekterdiń usynylýy, «Ushqan uıa ulaǵaty» degen taraýdan bastalyp «Nurly Jolǵa» ulasýy sııaqty ómirbaıandyq soqpaqtar tarıhı oqıǵalarmen sabaqtastyryla ret-retimen berilýi, sondaı-aq, ózara dıalog barysyndaǵy ıntellektýaldyq bıik ólshem men qazaqtyń shuraıly tili oqyrmandy ózine tartatyn erekshe tustarynyń qataryna jatqyzýǵa bolady, dep jalǵady sózin Memlekettik hatshy. Azııa men Eýropany qatar jaılaǵan Qazaq eliniń eki saıası júıe – totalıtarızmnen demokratııaǵa aıaq basýy, eki ekonomıkalyq júıe – josparly ekonomıkadan naryqtyq ekonomıkaǵa kóshýindegi qıyn shaqtar jan-jaqty aıtylady. Ásirese, táýelsizdiktiń basyndaǵy Semeı ıadrolyq polıgonyn jabý, «Baıqońyr» ǵarysh aılaǵynyń mártebesin belgileý, memlekettik shekarany delımıtasııalaý kezindegi Elbasynyń erekshe saıası erik-jigeri men kóregen dıplomattyǵy, sańlaq saıasatkerligi san qyrynan ashyp kórsetiledi. Kitapty oqı otyryp, elaralyq kezdesýler men kelissózderdegi Memleket basshysynyń suńǵyla saıasatkerligin, harızmalyq bıik óresin, muqalmas qajyr-qaıratyn shynaıy sezinip, tańǵalamyz jáne maqtanysh etemiz.
Sondyqtan, bul kitapty, birinshiden, Prezıdenttiń uly isteri men ulaǵatty ómiri jaıyndaǵy barynsha tolyq ǵumyrnamalyq shyǵarmalardyń biri retinde baǵalaýǵa bolady. Ekinshiden, qazirgi zamanǵy qazaqstandyq memlekettiliktiń baǵa jetpes dáıekti derekkózi retinde qundy bolyp otyr. Úshinshiden, bul kitap qazaqstandyq patrıotızmniń is júzindegi kórneki oqýlyǵyna aınalmaq. Iаǵnı, Elbasynyń ǵıbratty ǵumyry aıshyqtalǵan atalǵan kitap memleket jáne qoǵam qaıratkerleriniń, memlekettik qyzmetshilerdiń, ǵalymdar men stýdentterdiń, jalpy jurtshylyqtyń erekshe qyzyǵýshylyǵyn týdyratyny anyq. «О́mir ótkelderi» qoǵamnyń izdep oqıtyn rýhanı qundylyǵyna aınalatynyna senimdimin, dedi Gúlshara Ábdiqalyqova sóziniń sońynda.
Odan ári sóz belgili memleket jáne qoǵam qaıratkeri, tanymal ǵalym Myrzataı Joldasbekovke berildi. Prezıdenttiń jańa kitaby «О́mir ótkelderi» dep atalypty, dep bastady ol óziniń sózin. Elbasynyń balalyq shaǵynan danalyǵyna deıingi aralyq túgel qamtylypty. Avtordyń ómiri halqynyń, ózi qurǵan memleketiniń ómirimen taǵdyrlas, qatar, birge, tutas órilip, jalǵasyp keledi.
Qırap qalǵan, ıesiz qalǵan elden jańa memleket ornatý, ony qalyptastyrý, álemge tanytyp, moıyndatý, halqynyń esiktegi basyn álemniń tórine shyǵarý, avtordyń ózi aıtqandaı, ekonomıkasy qýatty, saıasaty turaqty, tańy araılap atatyn, keshi tynysh batatyn, halqy uıqyǵa alańsyz jatatyn, erteńine senetin memleket ornatý, qıynnyń qıyny edi, deı kelip, sheshen kitaptan Elbasynyń: «Meniń taǵdyrym – baqytty taǵdyr. Mańdaıyma myna jaryq dúnıege tarıhtyń tar tusynda kelýdiń, aınalasy jarty ǵasyrdyń o jaq, bu jaǵynda búkil álemdi tóńkerip túsirerdeı ǵajaıyp ózgeristerdi kórýdiń, sol uly istiń basynda turýdyń baqytyn jazǵan eken. Kóp nárseni kórdim, kóp jaıdy ózegimnen ótkerdim, aldymnan talaı kedergiler de kezdesti, olardyń keıbirin zaman qoıdy, keıbirin adam qoıdy. Sonyń bárinen de ótip búgingi kúnge jetip otyrmyn. Qazaqstan halqynyń álemdik órkenıet kóshine qýatty memleket kúıinde, halyqaralyq qoǵamdastyqtyń syıly múshesi retinde, búgingi baqytty, erteńgi eńseli el retinde qosylǵanyn kórip otyrmyn. Myń táýbe!» – degenin dáıeksóz retinde keltirip, osyǵan baılanysty óziniń oılaryn ortaǵa saldy.
Kitaptyń negizgi arqaýyn Qazaqstan tarıhynyń jańa zamany, ǵasyrlar boıy ańsaǵan táýelsizdik jolyndaǵy qym-qıǵash kúrester, halqymyzdyń búgingi baqytty, baıandy tirshiligi quraıdy. Sol bir mazasyz kúnderde, uıqysyz túnderde Prezıdenttiń janynda bolǵanymyzdy, elge kerek árqalaı is tyndyrǵanymyzdy búginde erekshe sezimmen eske alamyz, deı kelip, odan ári Myrzataı Joldasbekov Fıdel Kastronyń, ózge de belgili qaıratkerlerdiń suhbatqa qurylǵan ómirbaıandyq kitaptary sol kúıinde aýyzdan shyqqan áńgimege ǵana qurylmaǵany anyq, dedi. «О́mir ótkelderin» jazysýǵa, ondaǵy aıtylatyn áńgimelerdiń kóbin kózimen kórgen kisiniń atsalysqanyn – kitaptyń úlken tabystarynyń biri dep oılaımyn. Bul kitapty derekti roman dese de bolady. Tartymdy. Ǵıbratty. Qyzyǵyp oqısyń. Kózińiz, etińiz úırengen kádimgi suhbatty oqymaısyz, oıǵa, qısynǵa qurylǵan tereń, baısaldy, kemel, derekti kórkem shyǵarmany oqısyz, dedi ol. Elbasynyń bir qaptalynda júrgen kezimizde, táýelsizdiktiń aldyndaǵy eleń-alańda, alǵashqy jyldaryndaǵy dúrbeleń men dúbirden abyrjymaı aman shyqsaq, bul áýeli qadirmendi Elbasynyń, qala berdi osy Saýytbekterdeı azamattardyń arqasy edi, deı kelip, sóziniń sońynda ǵalym: «О́mir ótkelderi» – qalaı maqtaýǵa da, maqtanýǵa da, qandaı marapatqa da laıyqty eńbek, qutty bolsyn, dep sózin aıaqtady.
Kezek ózine tıgende belgili qoǵam qaıratkeri, akademık Kenjeǵalı Saǵadıev barlyq oqıǵany búkpesiz shynaıylyqpen baıandaǵan bul eńbektiń áseri men úshin úlken boldy, dep bastady óziniń sózin. Men bul kitapty ómirbaıan týraly suhbat qana emes, oqyrmannyń aldyna tartylǵan taǵylymy mol ómir fılosofııasy dep atar edim. Prezıdenttiń aıtqan árbir sózinde, onyń árbir ıiriminde jan dúnıeńdi qozǵaıtyn tereń oıly tolǵanystar jatyr. Elbasynyń júrgizgen reformalary erteńgi men búgingi urpaq úshin ǵana emes, óte alysty kózdegeni osy kitaptan aıqyn kórinip tur. Sondyqtan osyndaı strategııaly oı-júıelerin tanyta bilgenimen de bul eńbek barshamyz, ásirese, jastar úshin óte qundy. Men bul kitapty bizdiń elimizdiń bolashaǵyn qalaıtyn, jerimizdi aıalaıtyn, Otanymyzdy qorǵaıtyn jas qazaqstandyqtarǵa arnap áńgimelep shyqtym, deıdi Prezıdent. Osyndaı taǵylymy mol, ónegeli ómir jolyn jastarymyzdyń oqyp, bilip júrgenderi kerek-aq. Bul kitap bizdiń jastarymyzdyń boıyndaǵy patrıottyq sezimdi shalqyta túsetinine senimdimin, dedi K.Saǵadıev.
Kelesi kezekte ol mazmundy ómirdiń óte kólemdi suhbat retinde baıandalǵanyn suhbat alýshynyń da aıtarlyqtaı shyǵarmashylyq tabysy dep bilýimiz kerek ekenin atap kórsetti. Osyndaı pishim aıtatyn áńgimeniń arqaýyn keńitip, mazmunyn tereńdetip, oqýshyǵa áser etýin ósirgeni aıqyn seziledi. Suhbat alýshy belgili qalamger, jýrnalıst Saýytbek Abdrahmanovtyń osy suhbat tóńiregindegi máselelerge erekshe daıyndyqpen kelgeni jáne qalamgerlik sheberliginiń de joǵary ekenin kórip otyrmyz. Retin taýyp, qısyndy suraq qoıyp, keıbir oılardy túrtkilep otyrmasań, nebir kerekti dúnıeler oı túbinde jatyp qalyp, ómirdiń keıbir kúrdeli qyrlary sóz etilmeı qala beredi. Elbasynyń oı túkpirinde jatqan ıirimdi tolǵanystary jaryqqa shyǵyp, buryn aıtylmaǵan kóleńkeli, kómeski jaılar keńinen kóldeneń tartylyp otyr. Suhbat osynysymen de qymbat. Elbasynyń ózi aıtqanyndaı, suhbat kitabynyń negizgi arqaýy Qazaqstannyń jańa tarıhynyń eń bir qıyn da jarqyn sátteri, ıaǵnı shırek ǵasyrǵa jýyq egemendigimizdiń tarıhy. Dálirek aıtsaq, jańa memleket quryp, onyń ishki-syrtqy saıasatyn anyqtap, saıası-ekonomıkalyq júıesin jasaý jolyndaǵy Prezıdent kúresiniń tarıhy. Týǵan halqymnyń álem keńistigindegi laıyqty ornyn qaıtsem tabamyn degen Elbasynyń jankeshti eńbeginiń shejiresi. Osy maqsatqa búgingi kúni Prezıdent qol jetkizdi, tabandy kúres, jankeshti eńbek tamasha jemisin berip otyr, dedi K.Saǵadıev.
Odan ári akademık qazaq halqynyń tarıhynda zaman júgin abyroımen arqalaǵan talaı tolaǵaı tulǵalardyń bolǵanyn aýyzǵa aldy. Olar da el úshin, týǵan halqy úshin eńbegin aıamaı, terin tókken. Sondyqtan da esimderi urpaqtan-urpaqqa jetip, qurmetpen atalady. Degenmen, burynǵy zaman men qazirgi zaman júgi birdeı emes. Burynǵy zamanda el basqarǵandar óziniń dástúrlik qoǵamyn, qalyptasqan sharýashylyq júıesin saqtap, damytyp, ony ilgeriletý qamynda boldy. Onda qazaq óz ornyn jaqyn kórshileriniń arasynan, shaǵyn ǵana ortadan, ólsheýli keńistikten ǵana izdedi. Búgingideı búkil álem keńistigine shyǵyp, eki júzge jýyq álem elderiniń ortasynan óz ornyńdy tabý olarda bolǵan joq. Osy turǵydan qaraǵanda, bizdiń halqymyzdyń da, kóshbasshymyzdyń da moınyna túsken zaman talaby óte óktem boldy. Qazaqy qalpymyzdy saqtaı otyryp, oı-sanany jańǵyrtyp, memleket irgesin jańadan qalap, sharýashylyq júıesin jańadan jasaý arqyly taý kótergendeı qıyndyqpen álem elderi kóshinen qalmaý qamyn oıladyq. Búgin dittegen maqsatymyzǵa jettik dep aıta alamyz. Bul –halyqtyń, onyń ishinde Elbasynyń eren eńbeginiń jemisi, deı kelip, ǵalym onyń esimin Ulybrıtanııadaǵy Olıver Kromvel, Germanııadaǵy Bısmark, AQSh prezıdenti Franklın Rýzvelt, Túrkııa prezıdenti Kemal Atatúrik, Qytaı basshysy Den Sıaopın jáne basqalar sııaqty álemdik taý tulǵalarmen qatar qoıatynyn jetkizdi.
Biz Nursultan Ábishulyn álem órkenıetiniń esigin aıqara ashqan basshymyz dep batyl túrde aıta alamyz, degen akademık sóziniń sońynda suhbat-kitaptyń óte sátti shyqqanyn taǵy bir ret atap ótti. Endi onyń oqyrman qaýymmen qaýyshýyna sáttilik tileıik, dedi ol.
Osydan ári sóz «Kazahstanskaıa pravda» respýblıkalyq gazeti» AQ basqarmasynyń tóraǵasy Aleksandr Tarakovqa berildi. Ol óziniń sózinde Elbasy Nursultan Nazarbaevtyń ómiri men qyzmetine arnalǵan eńbekterdiń sońǵy kezderi jıi jaryq kórip jatqanyn qanaǵatpen atap ótti. Sonyń ishinde keshe Máskeýde tusaýy kesilgen N.Nazarbaev jaıly orystyń ozyq oıly qaıratkerleriniń pikirleri toqaılastyrylǵan «Jasampaz» jınaǵyn aýyzǵa aldy. Al búgingi kitaptyń mańyzy tipti erekshe, dedi ol. Suhbat kitabynda Prezıdent óziniń ómiri men isterin jýrnalıstke ashyq senimmen aqtaryp salǵan. Áńgime keıde naqty, shaǵyn sheńberde júzse, keıde úlken aıdynǵa shyǵyp, orasan úlken aýmaqty qamtyp ketedi. Sonyń ishinde Prezıdent jahandyq problemalar boıynsha da óziniń tereń oılaryn ortaǵa salyp otyrǵan. Soǵan sáıkes áńgimedegi problematıkanyń ekspressııasy men dınamızmi de ózgerip otyrady. Memleket basshysy ótken jyldardaǵy kóptegen qýanyshty da ókinishti jaılar týraly ashyq aıtqan. Suhbat alýshy reporter ǵana emes, kóptegen tetikterdi anyqtaı túsýdi maqsat etken bárinen habary bar, saıasattyń uńǵyl-shuńǵylyn tereń aıyrǵan adam retinde kórinip turady. Osynyń ózi oqyrmandardy ózine tarta túsedi. Suhbattasýshyǵa birinshi jaqtan áńgime aıtý ejelden bar ádis. Biraq bizdiń jaǵdaıymyzda suhbat alýshynyń sheberliginiń arqasynda avtordyń qupııa qyrlary ashyla túsken. Sondyqtan da bul kitapty mańyzy jaǵynan ensıklopedııalyq eńbek dep ataýǵa bolady. Ásirese, ol – jastarǵa óte paıdaly. Bul týraly Nursultan Ábishulynyń ózi de alǵysózde aıtyp ketipti.
Sóz Elbasynyń ejelgi joldasy, táýelsiz Qazaqstan Respýblıkasynyń tuńǵysh syrtqy ister mınıstri bolǵan Tóleýtaı Súleımenovke berilgende, ol bul kitaptyń óte erekshe kitap ekenin atap kórsetti. О́ıtkeni, ol Prezıdenttiń barlyq ómirin, qyzmeti men kisilik qyrlaryn óz aýzynan tıimdi tásilmen, úlken sheberlikpen aıtqyza bilgen, dedi ol. Osydan ári T.Súleımenov óziniń Nursultan Nazarbaevty 20 jasynan beri biletinin, sondyqtan halyq bile bermeıtin, biraq ózara belgili kóptegen jaıttardyń kitapta jazylǵanyn kórip otyrǵanyn tilge tıek etti. Men sol oqıǵalardyń kóbine aralasyp, Elbasymen birge ortasynda júrip, sol oqıǵalardyń kóbine kýá boldym, dedi sheshen. Odan ári ol mundaı aıryqsha kitap bizdiń elimizde tuńǵysh ret shyǵyp otyr dep oılaıtynyn jetkizdi. Men bul kitapty tarıhqa enedi dep oılaımyn. Árıne, qıyn jyldardy, kúrdeli oqıǵalardy eske alý ońaı emes. Men olardyń kóbin Prezıdentpen birge basymnan keshtim. 80-shi jyldardyń aıaǵy men 90-shy jyldardyń basyndaǵy qıynshylyqtardan eldi alyp shyǵýda N.Nazarbaev óziniń kelissóz júrgizýdiń has sheberi ekenin kórsete bildi. Men muny dıplomat, maman retinde aıtyp turmyn. Basynda ol Keńes Odaǵyn ekonomıkalyq daǵdarystan qutqarǵysy keldi. Sol úshin Gorbachevpen, Elsınmen kelissózder júrgizip, óziniń sol kezdegi oılaryn ortaǵa saldy. Osyǵan kóp ter tókkenin kózimiz kórdi. Al elimiz Táýelsizdik alǵandaǵy qıyndyqtardy eńserýde Elbasynyń daryny ashyla tústi. Ásirese, dıplomattyq qyrlary kúnnen-kúnge jetile berdi, deı kelip, onyń jas kezinen bitimgershil bolǵanyn jetkizdi. Sonyń mysaly retinde Dneprodzerjınskide oqyp júrgende jastar arasyndaǵy bir kıkiljiń úshin Qazaqstannan kelgenderdiń bárin oqýdan shyǵaryp jibermek bolǵanda jap-jas Nursultannyń ustazdar men ýchılıshe basshylaryn aqylǵa keltirip, kelisim jasatqanyn aıtty.
Osydan keıin jıynǵa moderatorlyq etip otyrǵan Mahmut Qasymbekov kitaptyń jazylýyn uıymdastyrýshy, Elbasymen suhbattasýshy Saýytbek Abdrahmanovqa sóz bermes buryn kitaptyń dúnıege qalaı kelgeni jóninde qysqasha anyqtama berip ótti. Men – bul kitaptyń barlyq 16 taraýynyń qalaı jazylǵandyǵynyń kýási bolǵan adammyn. О́ıtkeni, Saýytbek Abdrahmanov suhbattardy qaǵaz betine túsirgennen soń Elbasy qabyldaýynda bolǵannan keıin Nursultan Ábishuly ony muqııat oqyp, óz qolymen kóptegen túzetýler men tolyqtyrýlar engizip otyrdy. Suhbattyń keıbiri 3-4 saǵatqa deıin sozyldy. Sondyqtan negizgi eńbek Elbasynyń óziniki ekenin bilemiz. Biz Prezıdent kitaphanasynyń murajaıyna sol qoljazbalardy eksponat retinde qoıatyn bolamyz, dep ol sózdi Saýytbek Abdrahmanovqa berdi.
О́ziniń sózin Elbasy eńbeginiń tusaýkeser rásimine jınalǵandar men jyly pikir aıtqandarǵa rızashylyq bildirýden bastaǵan S.Abdrahmanov odan ári avtorlyq ómirbaıan týraly oı tolǵady. Ár adam ózinshe bir álem. Eshkim de adamdy sol adamnyń ózinen artyq bile almaıdy. Sondyqtan da Qasym aqyn: «О́zge emes, ózim aıtam óz jaıymdy», dep jyrlaǵan. Osy sebepti búkil órkenıetti álemde, saıası ádebıette avtorlyq ómirbaıan berik ornyqqan. Ásirese, keıingi kezeńderde el basqarǵan tulǵalardyń óz ómirbaıandaryn jazýy nemese suhbat túrinde baıandap berýi qalypty jaıǵa aınaldy. Bul arqyly memleket tarıhynda erekshe orny bar basshylardyń ǵumyrynan halyqtyń taǵylym alýy aldymen kózdeledi. Buryn da aıtqanbyz, taǵy da aıtamyz: Prezıdent týraly sóz Elbasynyń ózinen buryn elge kerek. Keleshegimiz úshin kerek. Qadym zamannan qaǵanyn qadirlep, hanyn qasıet tutqan eldiń bolashaqta da bıliktiń baǵasyn biletin, halyqtyń ózi saılap, eki tizgin, bir shylbyrdy qolǵa bergen adamyn qaltqysyz qurmetteý, el basshysyna taq túrý dástúri ornyǵa túsýi úshin kerek. Basshysyna taq turatyn el – basyna baq turatyn el. Nursultan Nazarbaev – halqyn taq turǵyzǵan, halqynyń basyna baq turǵyzǵan basshy, dedi S.Abdrahmanov.
Sodan keıin ol Elbasynyń bala kúninen búgingi dana kúnine deıingi ómirin áńgimeleýi bizdiń elimizdiń táýelsizdikke qol jetkizýi, búgingi bıigine kóterilýi, jalpy osyndaı memleket bolyp qalyptasýy eń aldymen Nursultan Nazarbaevtyń adamdyq bitimine, kisilik kelbetine, qaıratkerlik qyzmetine tikeleı baılanysty ekenine kámil sendiredi, dedi. Nursultan Ábishulynyń búkil ómir joly – ónege mektebi. Halyq qaınaryna qanýdyń, ulttyń janyn tanýdyń ónegesi. Ata-anany ardaqtaýdyń, ustazdardy, dostardy qasterleýdiń ónegesi. Qarshadaıynan aýyr jumyspen shyńdalǵan eńbekqorlyqtyń ónegesi. Aldan shyqqan, kitap ıesiniń óz sózimen aıtqanda, zaman qoıǵan, qoǵam qoıǵan, adam qoıǵan kedergilerdi eńserýdiń ónegesi. Qaıtpas qaısar qajyrlylyqtyń ónegesi. Syn saǵatta syr bermeıtin sarabdaldyqtyń, salqyn sabyrdyń ónegesi. Eliniń baǵy jolynda tarıhtyń qandaı táýekelinen de taıynbaıtyn tabandylyqtyń ónegesi. Alystan oılaýdyń, bolashaqty boljaıtyn kemeńgerliktiń ónegesi.
Halyqtyń tarıhı taǵdyryn bir adam aıqyndaı alatynyna biz Nazarbaev fenomeni arqyly anyq kóz jetkizemiz, dep jalǵady sózin Saýytbek Abdrahmanuly. Nursultan Ábishulymen suhbat qurǵan saǵattar – meniń adam retindegi de, jýrnalıst retindegi de baqytty sátterim. Elbasynyń qaıran qalarlyqtaı jady, oılaý júıesiniń beriktigi, oıyn anyq ta qanyq etip jetkizetin ári qarapaıym, ári qunarly tili, aýyzsha aıtqan áńgimelerin qaǵazǵa túsirip bergennen keıin qoljazbanyń ústinen qaraǵandaǵy talaı kásibı qalamgerler qyzyǵatyndaı redaksııalaý máneri men úshin úlken ómir mektebi boldy. Munyń ózi «Talantty adam – qaı iste de talantty» degen qaǵıdany taǵy da dáleldeı túsedi.
Elbasy kitaby bizdi ulttyq maqtanysh sezimine bóleıdi. Elbasymyz kezinde: «Baqyt baǵasyn bilgenniń ǵana basynda turady», degen edi. Nursultan Nazarbaevtyń «О́mir ótkelderi» kitaby bizge basymyzdaǵy baqyttyń baǵasyn bilýdi, táýelsizdikti qadirleýdi, qasterleýdi, ony kún saıyn, aı saıyn, jyl saıyn nyǵaıtyp otyrýdy úıretedi. Jańa kitaptyń basty qundylyǵy da osynda, dedi S.Abdrahmanov.
Tusaýkeser rásimi boıynda «Aq jaýyn» memlekettik kameralyq orkestri mýzykalyq qoldaý bildirip, ánshiler Ibragım Eskendir men Janat Shybyqtaev óner kórsetip otyrdy. Al belgili aıtysker aqyn Amanjol Áltaevtyń Elbasynyń jańa kitabyna aıtylǵan arnaýynyń úzindisi tómendegideı boldy:
Terbetip arý qala Astanany,
Aqynnyń shashý bolsyn dastan áni.
Búgingi kitabyńyz qutty bolsyn,
Eńseli Elbasymyz asqaraly.
Bul kitap armandarǵa jeteleıdi,
Jalyndaǵan jastardy, jas balany.
Jarqyrap halqymyzdyń baǵy jandy,
Nuraǵam nurly jolǵa bastaǵaly.
Táýelsiz Qazaqstandy tanyp-bilý,
Prezıdent tulǵasynan bastalady...
Iá, dál solaı!
Jaqsybaı SAMRAT,
«Egemen Qazaqstan».
Sýretterdi túsirgen
Erlan Omarov.
