Zań ár teńgeniń tıimdi jumsalýyn qadaǵalaıdy

Keshe Ortalyq kommýnıkasııalar qyzmetinde Qarjy mınıstri Baqyt Sultanov baspasóz máslıhatyn ótkizdi. Ol «Nurly Jol» baǵdarlamasyn júzege asyrýǵa qatysty Ulttyq qordan taǵy 76 mlrd. teńge bólinetinin aıtty. Qarjy mınıstrligi ótken aıdyń 11-shi juldyzynda bolǵan Úkimettiń keńeıtilgen otyrysynda Memleket basshysy júktegen tapsyrmalar boıynsha birqatar sharalar qarastyrypty. Atap aıtqanda, aǵymdaǵy jyl men orta merzimdegi bolashaqta ekonomıkalyq saıasatty júrgizý jónindegi tapsyrmalardy oryndaýǵa baılanysty naqty sheshimder qabyldanǵan. Osy týraly áńgimelegen mınıstr, maqsatqa jetý úshin qysqa merzimde daıyndalǵan arnaıy zań Parlament Senatynyń qaraýynda ekenin aıtty. Soǵan qaraǵanda, taıaýda Parlament Senaty aǵymdaǵy jylǵy bıýdjet jobasyn naqtylaý týraly óz sheshimin qabyldaıtyn bolady. «Aǵymdaǵy jyldyń 11 aqpanynda ótken Úkimettiń keńeıtilgen otyrysynda Elbasy biraz tapsyrma bergeni málim. Solardyń ishinde eń mańyzdy máselelerdiń biri syrtqy ekonomıkadaǵy ahýaldardyń búgingi elimizdiń ekonomıkasyna keri áserlerine qarsy sharalardy der kezinde qabyldaý bolyp tur, olardyń qatarynda qarjylyq sharalar da bar», dedi B.Sultanov. Mınıstr el kútken «Nurly Jol» baǵdarlamasyn júzege asyrý maqsatynda Ulttyq qordan qosymsha 76 mlrd. teńge qarjy bólinetindigin de aıtyp ótti. «Búgindegi ekonomıkamyzdyń ósý deńgeıi men ımport pen eksport kórsetkishteriniń tómendeýine baılanysty bıýdjetimizdi naqtylaýymyz qajet. Osyǵan oraı arnaıy zań jobasy qysqa merzim ishinde ázirlenip, Parlamentke usynylǵan edi. Endi, erteń Senat aǵymdaǵy jylǵy bıýdjet jobasyn naqtylaý týraly óz sheshimin qabyldaıtyn bolady», degen vedomstvo basshysy, jańa zań ár teńgeniń tıimdi jumsalýyn qatań qadaǵalaıtyndyǵyn meńzedi. Buıyrtsa, bıylǵy jyly elimizdiń ishki jalpy óniminiń ósimi 1,5 paıyz deńgeıinde saqtalatyn kórinedi. Úkimet álemdik ekonomıkanyń ósý qarqynynyń báseńdeýine, munaı baǵasynyń tómendeýine jáne elimizdiń ekonomıkasyna keri yqpal etetin basqa da jaǵymsyz faktorlarǵa baılanysty bıýdjetti ońtaılandyrý jumystaryn júrgizipti. «Máselen, bıýdjetti ońtaılandyrý kezinde biz munaıdyń bir barrelin 50 dollar mólsherinde naqtyladyq. Budan shyǵatyn nátıje, ishki jalpy ónimniń ósimi bıylǵy jyly 1,5 paıyz deńgeıinde saqtalady dep úmittenemiz», dedi ol. Elimizde múlikti zańdastyrý aksııasy da óz nátıjesin berip jatyr eken. «Múlikti zańdastyrý aksııasy barysynda 200 mlrd. teńgeden astam qarajatqa múlikti jarııa etý boıynsha ótinishter kelip tústi. Shamalap aıtar bolsaq, bul 1 mlrd. dollar bolady. Buǵan qosa, ekinshi deńgeıli bankterde 69 shot ashyldy, oǵan 10 mlrd. teńgege jýyq qarajat salynǵan. Bul qarjylar aınalymǵa da túsip úlgerdi», degen mınıstr, osy somanyń úshten birin ıeleri ýaqytynan buryn alýǵa tilek bildirgen, sonyń arqasynda onyń 10 paıyzy memleket bıýdjetine kelip qosylǵanyn jetkizdi. Osy paıyzdy aqshaǵa aınaldyryp kórsek, bıýdjetke shamamen 300 mln. teńge kiris kirgen. Onyń úshten biri Qazaqstan ekonomıkasyna salynyp, olar 10 paıyzdyq alymnan bosatylypty. Osylaısha, bul qarajattar jumys isteı bastapty. Baspasóz máslıhatynda kezekten tys ótkeli turǵan prezıdenttik saılaýdy ótkizýge qansha qarajat qarastyrylǵany da suraldy. «Tıisti memlekettik organdarmen bul máseleni talqyladyq. Arnaıy jumys toby da qurylǵan bolatyn. Saılaýǵa qajet aqshany jan-jaqty esepteı kelip, 5,5 mlrd. teńge kólemindegi qarajat jetkilikti bolar dep sheshtik. Búgin bul somany Úkimettiń qorynan bólý qarastyrylyp jatyr», dedi B.Sultanov. Nurbaı ELMURATOV, «Egemen Qazaqstan».