Qazaqstan uıymǵa óz talaptarymen kirip otyr

Keshe Ortalyq kommýnıkasııalar qyzmetinde Eko­no­mıkalyq yqpaldastyq mınıstri Janar Aıtjanova, Aýyl sharýashylyǵy mınıstri Asyljan Mamytbekov, Ádilet vıse-mınıstri Elvıra Azımova, Investısııalar jáne damý vıse-mınıstri Albert Raý, Ulttyq kásipkerler palatasy tóraǵasynyń orynbasary Rahym Oshaqbaev baspasóz más­lıhatyn ótkizdi. Birinshi bolyp sóz kezegin alǵan J.Aıtjanova DSU tarıhynda Qazaqstan kelissózder bo­ıynsha eń kúrdelisi bolǵanyn aıt­ty. «Bizdiń kelissózderimiz 19 jyldan astam merzimge sozyl­dy. DSU hatshylyǵynyń jáne bizben kelissóz júrgizgen iri memleketterdiń pikirine zer salsaq, DSU qurylǵaly beri bizdiń kelissózder eń kúrdeli kelissóz bolyp tabylady eken.  Sebebi, biz Kedendik odaqtamyz, munymen birge 2012 jyldan bastap Eýrazııalyq ekonomıkalyq odaqqa da múshe bolyp tabylamyz. Sondyqtan, mańyzdy máselelerimizdiń jartysy derlik EAEO komıssııasynyń quzyrynda. Negizi, barlyq máselelerdi EAEO-ǵa múshe memlekettermen aqyldasyp, kelise otyryp, osy sheshimderdi qabyldadyq dep aıtýymyzǵa bolady», dedi mınıstr. Kelissózder barysynda ózimizdiń eldik múdde-talaptarymyz da tabandy qorǵalyp, keleli istiń osynshalyq sozylýyna sebep bolypty. Spıkerdiń sózine qaraǵanda, Qazaqstannyń syrtqy saýdadaǵy eń iri úlesi DSU-ǵa múshe memleketterge tıesili eken. Sondyqtan, elimizdiń atalmysh uıymǵa enýi zańdy dep sanaıdy. «Búgingi tańda DSU-ǵa álemniń 161 memleketi múshe bolyp otyr. Álemdik saýdanyń 98 paıyzy osy memleketterdiń úlesine tıedi. Eger Qazaqstan týraly aıtatyn bolsaq, 2014 jyldyń sońǵy derekteri boıynsha, bizdiń syrtqy saýda aınalymymyz 119,4 mlrd. AQSh dollaryn qurady. Osy saýdanyń eń iri úlesi DSU-ǵa múshe memleketterge keledi. Syrtqy saýdanyń 40 paıyz úlesin Eýroodaq elderi alyp otyr. Odan keıin Reseı – 19, Qytaı – 18, Shveısarııa – 5, Túrkııa 3 paıyz bolyp keledi. Sol sebepten bizge syrtqy saýda aınalymynda áriptes bolyp júrgen memleketterdiń barlyǵy DSU músheleri bolyp sanalady. DSU-ǵa ótý degen – tek qana syrtqy saýda saıasatyn ǵana emes, óziniń ekonomıkalyq, aýyl sharýashylyǵy, ónerkásip salasyndaǵy saıasattaryn osy DSU erejeleri men quqyqtyq bazasyna saı júrgizý degen sóz. Ol bizdiń elge keletin tikeleı sheteldik ınvestısııanyń kólemin arttyrýǵa tikeleı septigin tıgizedi. Biz táýelsizdik alǵan bastapqy jyldarda basqa eldermen eki jaqty saýda jáne ınvestısııalyq kelisimderge qol qoıǵan bolatynbyz. Sol kelisimderdiń arqasynda búgingi kúni bizdiń ekonomıkamyzǵa 200 mlrd. dollardy quraıtyn tikeleı sheteldik ınvestısııalary keldi. Ol bizdiń ekonomıkamyzdyń órkendeýine tikeleı áser etti. Ekonomıkamyzdyń qazirgi damýy kezeńinde bizdiń eń úlken maqsat – ony ártaraptandyrý. Bizdiń eksportymyzdyń 80 paıyzy shıkizattyń enshisinde. Sondyqtan biz qazirgi zamanǵy ınvestısııalyq jáne saýda kelisimderin jasap jatyrmyz», dep qaıyrdy sózin J.Aıtjanova. Baspasóz máslıhatynda DSU-ǵa kirýdi barlyq máselelerdiń sheshimi dep qaraýǵa da bolmaıdy eken. «DSU-ny qandaı da bir sanatorıı nemese barlyq máselelerdiń sheshimi dep qarastyrýǵa bolmaıdy. DSU – básekelestiktiń jańa satysy, jańa belester men jańa táýekelder. Bul ımportshylardyń múmkindikteriniń artýy», dedi aýyl sharýashylyǵyna qatysty aıtqan A.Mamytbekov. Mınıstrdiń pikirin bajaılasaq, Qazaqstannyń DSU-ǵa kirýi jańa ınvestısııalar tartýǵa, daý-janjaldardy halyqaralyq sottarda sheshýge, sondaı-aq, halyqaralyq saýda erejelerin qurýǵa atsalysýǵa múmkindik týady. «Meniń oıymsha, aýyl sharýashylyǵy úshin kóptegen múmkindikter bolady. Bizdiń endigi mindetimiz sol múmkindikterdi jiberip almaı, júzege asyra bilý bolmaq», dep túıindedi sózin mınıstr. Nurbaı ELMURATOV, «Egemen Qazaqstan».