QAZAQSTAN-RESEI: Yqpaldy yntymaqtastyq

Elbasy Nursultan Nazarbaev saltanatty jaǵdaıda ashyp, sony tabystar tilegen «KamAZ-Injınırıng» aksıonerlik qoǵamyna 10 jyl tolyp otyr. Osy aıtýly oqıǵaǵa baılanysty Aqmola oblysynyń ákimi Sergeı Kýlagın «KamAZ» ashyq aksıonerlik qoǵamynyń bas dırektory Sergeı Kogogın bastap kelgen reseılik delegasııa múshelerin qabyldap, ekijaqty yntymaqtastyqty odan ári nyǵaıtý máselelerin talqylady. Qazaqstan-Reseı birlesken kásiporny az ýaqyttyń ishinde otandyq mashına jasaý salasyn damytýǵa laıyqty úlesin qosyp keledi. Bul eki el arasyndaǵy ekonomıkalyq, kadrlyq saıasattyń sarabdaldyǵynyń jemisi. Kásiporyn qurylǵan alǵashqy 2005 jyldary júk kóliginiń úsh túrin shyǵarýdyń ózinde biraz qıyndyqtar bolǵan edi. Qazirgi kezde Kókshetaý zaýytynda ýaqyttyń óskeleń talabyndaǵy «KamAZ» júk kólikteri men arnaıy tehnıkanyń 40-tan astam túri ıgerildi. Osy alǵashqy onjyldyqta zaýyt konveıerinen 10 myńnan astam kólik shyǵaryldy. Bul kólikter búginde Qazaqstan Respýblıkasynyń Qarýly Kúshteri, Tótenshe jaǵdaılar komıteti, jol qurylysy jáne aýyl sharýashylyǵy salasynda tıimdilikpen paıdalanylýda. Kásiporynnyń óndiristik qýaty jylyna 2000-ǵa jýyq avtokólik shyǵarýǵa múmkindik beredi. Sońǵy kezde zaýyt basshylyǵy ónimde otandyq úlestiń mol bolýyna erekshe nazar aýdaryp otyrǵanyn aıtý qajet. Ony elimizdiń barlyq aımaqtarynda júıtkip júrgen «Qazaqstanda jasalǵan» degen belgisi bar arnaıy tehnıkalardan baıqaýǵa bolady. Sonymen qatar, elimizdiń ár óńirinde servıstik qyzmet kórsetý oryndary jumys isteýde. Oblystyq ákimdikte ótken kezdesýde óńir basshysy Sergeı Kýlagın atalǵan kásiporynnyń osy jetistikterin tilge tıek etti. Ásirese, zaýyttyń aýyr ónerkásip salasyndaǵy alatyn orny erekshe ekenin aıta kele, sońǵy kezde «KamAZ» júk kóligine degen suranys azaıyp bara jatqanyna nazar aýdardy. Reseılik qonaqtardan osy maqsatta belgilikti jumystar júrgizilýi qajettigi alǵa tartyldy. Kezdesýde aksıonerlik qoǵamdy damytýǵa qatysty ózge de birqatar máseleler talqylanyp, ózara yqpaldastyq týraly ýaǵdalastyq jasaldy. «KamAZ» ashyq aksıonerlik qoǵa­mynyń bas dırektory Sergeı Kogogın bastaǵan delegasııa Kókshetaýdaǵy «KamAZ-Injınırıng» aksıonerlik qoǵamynyń óndiristik sehtarynda bolyp, júk kóligin shyǵarý jumystarymen tanysty. Budan ári reseılik qonaqtar oblys ákimi Sergeı Kýlagınmen birge Sh.Qusaıynov atyndaǵy qazaq mýzy­kalyq-drama teatrynda ótken saltanatty sharaǵa da qatysty. Onda sóz sóılegen óńir basshysy ujym múshelerin osynaý mereıtoılarymen quttyqtap, aldaǵy jumystaryna sáttilik tiledi. – Elbasy Nursultan Nazarbaevtyń ózi arnaıy kelip ashqan bul kásiporynnyń keleshegi zor. Búginde «KamAZ-Injınırıng» AQ elimizde júk kóligin qurastyratyn biregeı zaýyt. Bıylǵy jyly barlyǵy 800 birlik avtokólik shyǵaramyz dep josparlap otyrmyz. Ol úshin bizde barlyq múmkindikter bar, – deı kele, Sergeı Kýlagın atalǵan kásip­orynnyń bir top ınjener-tehnık qyzmet­kerleri men jumysshylaryn «Qazaqstan Respýblıkasynyń Konstıtýsııasyna 20 jyl» merekelik medalimen jáne oblys ákiminiń Alǵys haty, ózge de baǵaly syılyqtarmen marapattady. Sonymen qatar, shara barysynda Qorǵanys mınıstriniń orynbasary Nurlan Saýranbaev, «KamAZ» AQ bas dırektory Sergeı Kogogın, «KamAZ-Injınırıng» ulttyq kompanııasy» AQ basqarmasynyń tóraǵasy Er­lan Ydyrysov, «KamAZ» VTK» AQ bas dırektory Rafaıl Gafeev jáne Kók­she­taýdaǵy kásiporyn dırektory Sergeı Kıstın sóz sóılep, jetken jetistikter men alda turǵan mindetterge toqtaldy. Baqbergen AMALBEK, «Egemen Qazaqstan». Aqmola oblysy.