Áriptestik aýqymy keńeıe túspek

Qazaqstan Respýblıkasynyń Prezıdenti Nursultan Nazar­baev­tyń ekonomıkanyń shıkizattyq emes sektoryna otandyq jáne sheteldik ınvestısııalar tartý kólemin ulǵaıtý jáne eksporttyq áleýetti damytý boıynsha alǵa qoıǵan mindetterge sáıkes ústi­mizdegi jyldyń 13-14 tamyzynda Aqtóbe oblysynyń ákimi Arhı­med Muhambetovtiń bastaýymen Túrik Respýblıkasynyń Konıa qalasyna bıznes-delegasııa sapary uıymdastyryldy. Delegasııa quramyna aımaqtyq kásipkerler palatasy, «Aqtóbe» ÁKK» UK» AQ ınvestorlarǵa qyzmet kórsetý ortalyǵy ókilderi endi. Sapardyń negizgi maqsaty – qazirgi zamanǵy Túrkııanyń jedel­detilgen damýynyń jınaqtalǵan tájirıbesin, negizinen ónerkásiptik ortalyq – Konıa qalasy ındýs­trııalyq aımaǵynyń qyzmet etý mehanızmin zertteý bolyp tabylady. Konıa qalasynda 9 uıymdasqan óner­kásiptik aımaq pen 15 shaǵyn ındýs­trııalyq aımaq jumys isteıdi. Aımaqaralyq yntymaq­tas­tyqty damytý maqsatynda Aqtóbe oblysynyń ákimi Arhımed Muham­betov Konıa aımaǵy basshy­ly­ǵymen kezdesti. «Jasyl tehnologııany» qoldanatyn energetıka, qurylys ındýstrııasy, metall óńdeý salasyndaǵy birqatar kásiporyndarda boldy. Sondaı-aq, oblys ákimi Antalıa qalasynyń merimen kezdesip, týrıstik saladaǵy ınvestısııalyq yntymaqtastyq máselelerin talqylady. 2049 gektar aýmaqty ıelengen Konıanyń uıymdasqan ónerkásip aımaǵynda óndiristiń 80 ártúrli sektorynda 520 kásiporyn jumys isteıdi, olarda 30 myń adam eńbek etedi. Avtomobıl ónerkásibi, mashına jasaý jáne jabdyqtar, metall ónimderi óndirisi, azyq-túlik jáne sýsyndar óndirisi, jıhazdar, teri, plastmassa, rezeńke, toqyma buıymdary, aǵash, qaǵaz jáne metall emes mıneraldy ónimder sekildi salalar damý ústinde. Konıanyń uıymdasqan óner­kásip aımaǵynda bolý barysynda Aqtóbe oblysynyń ınvestısııalyq áleýeti men jobalary tanystyryldy, ekonomıkanyń ártúrli salalary boıynsha áriptestik týraly kásiporyndardyń usynystary bildirildi. Aqtóbe oblysynyń ákimdigi iri deńgeıdegi jobalardy júzege asyrýǵa Túrkııa ınvestısııasyn tartýǵa múddeliligin bildirdi. Satybaldy SÁÝIRBAI, «Egemen Qazaqstan». AQTО́BE.