Qyzylordalyq sharýalar sýǵa artyq shyǵyn shyǵarmaıdy

QYZYLORDA. 14 qazan. Qyzylorda oblysynyń kásipkerler palatasynan oblystyq tabıǵı resýrstar jáne tabıǵat paıdalanýdy retteý basqarmasy «Qyzylorda oblysy boıynsha jer ústi kózderiniń sý resýrstaryn paıdalanǵany úshin tólemaqy stavkalaryn bekitý týraly» Qyzylorda oblystyq máslıhatynyń sheshim jobasyna saraptamalyq qorytyndy berýdi suratqan bolatyn. Bul týraly egemen.kz tilshisi habarlady. Atalmysh sheshim jobasynda sý resýrstaryn paıdalanǵany úshin aýyl sharýashylyǵy sýbektilerine tólemaqyny 74,4 esege kóterý kózdelgen. Qujatty ázirleýshiler tólemaqy sońǵy ret oblystyq máslıhattyń 2006 jylǵy 30 maýsymdaǵy №299 sheshimimen bekitilip, jergilikti ókildi organmen 9 jyl boıy bazalyq tólemaqy kóterilmegendigin alǵa tartty. О́z kezeginde, Kásipkerler palatasy aımaq turǵyndarynyń basym bóligin aýyldyq jerdiń turǵyndary quraıtyndyǵyn, olardyń negizgi tabys kózi – aýyl sharýashylyǵy salasy bolyp tabylatyndyǵyn nazarǵa ala otyryp, tólemaqyny birden kóterý qazirgideı «erekshe ekonomıkalyq jaǵdaıda» oblysymyzdyń aýyl sharýashylyǵynyń damýyna keri áserin tıgizetindigin jetkizdi. Osy oraıda, Palata tarapynan memlekettik organǵa aýylsharýashylyǵy boıynsha sý resýrstaryn paıdalanǵany úshin tólemaqyny kóterýdi toqtatyp, ári qaraı tólemaqynyń kezeń kezeńimen ósýin qarastyrý týraly usynys berildi. Kásipkerler palatasy men memlekettik organnyń arasynda júrgizilgen kelissózderdiń nátıjesinde sý resýrstaryn paıdalanǵany úshin tólemaqyny kóterý toqtatyldy. Erjan Baıtiles. Derek, sýret: egemen.kz.