Telefonmen kóp sóılesetin sheneýnikterge eskertý jasaldy

ORAL. 6 naýryz. Batys Qazaqstan oblysynyń ákimi Nurlan Noǵaev Úkimet deńgeıindegi selektorlyq májilis kezinde smartfondarymen áýrelenip otyratyn jergilikti sheneýnikterge eskertý jasady. Bul týraly egemen.kz tilshisi habarlady. Máseleniń mánisi mynada. Aldyńǵy kúnderdiń birinde QR Premer mınıstriniń orynbasary Berdibek Saparbaevtyń tóraǵalyǵymen respýblıkada dýaldy oqytý júıesin engizý jóninde selektorlyq májilis ótkizilgen. Oǵan Batys Qazaqstan oblysynan kásipkerler, kolledjder men arnaýly orta oqý oryndarynyń jetekshileri, oblystyq basqarma basshylary jáne jergilikti atqarýshy organdardyń ókilderi qatysqan. «Moı gorod» portalynan alynǵan derekte selektorlyq baılanys aıaqtalǵan soń oblys basshysynyń oǵan qatysýshylarǵa eskertý bergeni aıtylǵan. Onda bylaı delingen: «Májilis eki saǵatqa sozyldy. Munda búgingi kúnniń ózekti máseleleriniń biri qaraldy. Soǵan qaramastan sizder basty nazardy kún tártibinde turǵan máselege aýdarýdyń ornyna smartfondaryńyzben shuqylanyp otyrdyńyzdar. Bul qyzmet etıkasyna sáıkes kelmeıdi. Ras, qazir aqparattyq tehnologııa ǵasyry. Bul qural qajet te. Alaıda, selektor ýaqyty kezinde jumys isteýdiń ornyna basty kóńildi smartfonǵa aýdarǵandaryńyz kelispeıdi. Bularyń qalaı? Úkimet jetekshileriniń biri selektorlyq májilis ótkizedi. Jandaryńyzda oblys basshysy otyrady. Eshqaısyn da eleń etpedińizder. Sondyqtan keleside mundaı ádetterińizdi tyıýlaryńyzdy ótinemin». Oblys basshysynyń bul eskertýi óte oryndy dep bilemiz. О́ıtkeni dýaldy oqytý júıesi sekildi birqatar memlekettik baǵdarlamalardyń óńirlerge engizilý deńgeıi tómen ekeni jasyryn emes. Munyń ózi tıisti salaǵa tikeleı qatysy bar jetekshilerdiń joǵaryda oblys basshysy aıtqandaı enjarlyǵy men nemkettiliginen oryn alyp júrmesine kim kepil? Temir Qusaıyn. Derek: egemen.kz. Sýret: macdigger.ru.