Soltústik Qazaqstanda kóktemgi egiske daıyndyq pysyqtaldy

PETROPAVL. 6 naýryz. Petropavldaǵy N.Pogodın atyndaǵy oblystyq orys drama teatrynda ótken semınar-keńeste kóktemgi dala jumystaryn uıymshyldyqpen júrgizý máselesi talqylandy. Bul týraly Soltústik Qazaqstan oblysy ákimdiginiń baspasóz ortalyǵy habarlady. Jıynǵa aýdan, aýyl ákimderi, vedomstvolardyń, uıymdardyń jáne agroqurylymdardyń basshylary, ǵalymdar men ónim jetkizýshi fırmalardyń ókilderi qatysty. Semınar-keńesti aımaq basshysy Erik Sultanov ashyp, júrgizip otyrdy. Ol kirispe sózinde agrarlyq sala oblys ekonomıkasynyń negizi ekenin aıtyp, «Onyń úlesi jalpy óńirlik ónimniń 24 paıyzyn quraıdy. Kóktemgi egis qol jetken tabystardy odan ári arttyrýdyń qamy, basty sharalardyń bastaýy», dedi. Oblys ákiminiń birinshi orynbasary Aıdarbek Saparov kóktemgi dala jumystaryna baılanysty alda turǵan mindetterdi baıandady. Memleket basshysynyń tapsyrmasyna oraı egis alqaptaryn ártaraptandyrý maqsatymen 3 mıllıon 300 myń gektarǵa dándi jáne dándi-burshaqty, 568 myń gektarǵa maıly, 448 myń gektarǵa jemazyqtyq daqyldar sebý kózdelgen. Mıneraldyq tyńaıtqyshtar qunyn arzandatý úshin memleketten 2 mıllıard 158 mıllıon, gerbısıdke 2 mılllıard 365 mıllıon teńge demeýqarjy bólinip otyr. О́simdik sharýashylyǵyn qoldaýǵa arnalǵan demeýqarjynyń mólsheri 11,4 mıllıard teńgeni quraıdy. Agroqurylymdar men seriktestikter tuqymmen 93 paıyz qamtamasyz etilgen. Jaýapty naýqanǵa 15,3 myń traktor, 16,2 myń tuqymsepkish, 1100-deı sebý kesheni, 5,8 myń júk avtomobıli, 50 myńnan astam topyraq óńdeý tehnıkasy qatysady dep josparlanǵan. Búginde mashına-traktor parki 72 paıyzǵa daıyn. Baraev atyndaǵy astyq sharýashylyǵy ǵylymı-óndiristik ortalyǵynyń dırektory Jeksenbaı Qasqarbaev kóktemgi dala jumystarynyń strategııasy, Sibir aýyl sharýashylyǵy ǵylymı-zertteý ınstıtýtynyń zerthana meńgerýshisi Leonıd Iýshkevıch Sibirdiń ońtústigindegi kóktemgi naýqandy ótkizýdiń erekshelikteri, Sibir tájirıbe stansııasy dırektorynyń orynbasary Aleksandr Pýzıkov Batys Sibir men Soltústik Qazaqstan oblysynyń maıly daqyldary jaıly pikirlerin alǵa tartty. «Álibı-Agro» jaýapkershiligi shekteýli seriktestigi baqylaý keńesiniń tóraǵasy Nurlan Tileýbaev, «Astyq-Stem» JShS-niń dırektory Sergeı Zvolskıı kóktemgi dala jumystaryn uıymshyldyqpen ótkizýge baılanysty óz oılarymen bólisti. О́mir Esqalı. Derek: Soltústik Qazaqstan oblysy ákimdiginiń baspasóz ortalyǵy. Sýret: munara.kz.