Devıs kýbogy jarysynda Mıhaıl Kýkýshkın Sımone Bolellıdi jeńdi

ASTANA. 6 naýryz. Dál qazir Astanadaǵy «Dáýlet» Ulttyq tennıs ortalyǵynda tennısten Devıs kýbogy jarysy aıasynda Qazaqstan men Italııa arasyndaǵy oıyn ótýde. Alǵashqy oıynda nómiri birinshi tennısshimiz Mıhaıl Kýkýshkın qarsylasy Sımone Bolellıdi 3:0 (7:6 (8:6), 6:1, 6:2) esebimen jeńip, jalpy esepte bizdiń komandany alǵa shyǵardy. Bul týraly egemen.kz habarlady. Alǵashqy sette 1 saǵat 6 mınýt oınaǵan qarsylastar jeńimpazdy taı-breık arqyly anyqtady. Bul synda otandasymyzdyń baǵy basym boldy. Al ekinshi jáne úshinshi sette Bolellı bizdiń tennısshige qarsy esh shara qoldana almady. Ekinshi sette tek bir geımde ǵana upaı alǵan ıtalıan kelesi kezeńde enshisine nebári eki upaı jazdy. Kýkýshkınniń jeńisinen keıin Qazaqstan 1:0 esebimen alǵa shyqty. Qazir kortta qazaqstandyq Andreı Golýbev pen qarsylasy Andreas Seppı talasqa túsýde. Alǵashqy settiń qorytyndysy boıynsha Seppı alda keledi. Ol birinshi kezeńde Andreıdi 6:3 esebimen jeńdi. Kýkýshkın men Bolellı arasyndaǵy teketires týraly aıtar bolsaq, qos tennısshi osyǵan deıin 3 ret kúsh synasqan. О́kinishke qaraı, sonyń barlyǵynda ıtalıannyń mereıi ústem boldy. Iаǵnı, búgin Mısha Bolellıdi alǵash ret jeńip otyr. Elaman Qońyr. Derek: egemen.kz. Sýret: daviscup.com.