Qaıyrymdylyq keshi syrqat sábıge úmit otyn syılady

Álıhan qazir 5 jasta. 4 aılyǵynda tal­ma aýrýyna ushyrap, múgedek bolyp qal­ǵan. Al, 3 jasynda sóıleýden qal­dy. Ata-anasy týǵan-týystarynyń, eńbektes árip­testeriniń, jurtshylyqtyń qar­jylyq qoldaýy arqasynda ony byltyr Germa­nııadaǵy jetekshi klınıkalardyń birinde emdetipti. – Shetelde emdetkeli ulymyz táýirlengen syńaıly. Azdap tilge kele bastaǵany qýantady. Ondaǵy dárigerler qulan-taza saýyǵyp ketýine kepildik bergenimen, kúrdeli operasııalarǵa qomaqty aqsha kerek. Oǵan shamamyz kelmeıdi, – deıdi erli-zaıypty Japarovtar. Alańsyz balalyq shaqtyń qyzyǵyn kóre almaı ósip kele jatqan «baýyr eti – bala» úshin qatty qınalǵan ákesi Samat birqatar tanymal ánshilerge telefon soǵyp, kómek qolyn sozýdy ótingen. Qazaqstandyq estrada juldyzdary arasynan Maıra Ilııasova men Nurlan О́nerbaev balanyń emine qajetti qarajatty jınaýǵa kómektesý maqsatymen konsert ótkizýge kelisim bergen. Bul bastamaǵa oblys ákimdigi de qoldaý kórsetken. Kishkentaı Álıhan úshin uıymdastyrylǵan «О́mirge qushtarlyq» atty qaıyrymdylyq keshine jınalǵan jurtshylyqta esep bolmady. Qyzyljar óńirine arnaıy at terletip kelgen maıtalman óner ıeleri 3 saǵatqa jýyq «Metro» konsert zalyn tamasha áýenge bólep, erekshe kóńil-kúı syılady. Olarǵa belgili prodıýser Erjan Qabdýllın qosylyp, kesh ajaryn asha tústi. «Jan anam» qaıyrymdylyq qorynyń jetekshisi Maıra Ilııasova Maǵjan eline alǵash ret kelip otyrǵanyna qaramastan úlken áser alǵanyn, tyńdarmandardyń yqylasy keremet tánti etkenin jetkizdi. – Qaıyrymdylyq degen–tereń ári qasıetti uǵym. Búgingideı meıirim, baýyrmaldyq barynsha kemigen tasbaýyr zamanda adamdardyń bir-birine degen iltıpaty aýadaı qajet ekenin uǵynatyn mezgil jetti. О́mir ESQALI «Egemen Qazaqstan». Soltústik Qazaqstan oblysy.