«Barys» bıylǵy maýsymdaǵy 15-jeńilisine ushyrady

ASTANA. 14 qazan. Búgin Astananyń «Barysy» Qurlyqtyq hokkeı lıgasy sheńberinde óz aıdynynda Habarovskiniń «Amýryn» qabyldap, 2:3 esebimen jeńilip qaldy. Bul týraly egemen.kz habarlady. Oıyn teń jaǵdaıda órbidi. О́z múmkindikterin tıimdi paıdalanǵan qonaqtar Oleg Lıdiń kómegimen 5-mınýtta esep ashty. Arada bar bolǵany 3 mınýt ótkende, «Barys» sapynan Naıdjel Doýs tarazy basyn teńestirdi. Degenmen, úziliske deıin «Amýr» hokkeıshileri taǵy bir shaıba soǵyp úlgerdi. Bul joly Vıacheslav Ýshenın mergendigimen kózge tústi. Ekinshi kezeńde aıdyn ıeleri shıraq qımyldady. Nátıjesinde 35-mınýtta Konstantın Pýshkarev «Barystyń» ekinshi shaıbasyn soqty. Degenmen, reseılikter 53-mınýtta úshinshi ret bizdiń qaqpany dál kózdep, mańyzdy úsh upaıǵa qol jetkizdi. Jeńis shaıbasynyń avtory – Artem Zýb. Osymen astanalyqtar bıylǵy maýsymdaǵy 15-jeńilisine ushyrady. Búginde 22 oıynnan 25 upaı jıǵan «Barys» Shyǵys konferensııasynda 12-orynda keledi. Evgenıı Koreshkovtyń shákirtteri kelesi kezdesýin 17 qazanda Podolskide jergilikti «Vıtıazben» ótkizedi. Elaman Qońyr. Derek: egemen.kz. Sýret: hcbarys.kz.