Memleket basshysy Pákstan premer-mınıstrimen kezdesti

ASTANA. 26 tamyz. Elbasy Qazaqstanǵa resmı saparmen kelgen Pákstan Islam Respýblıkasynyń premer-mınıstri Navaz Sharıfpen kezdesti. Bul týraly akorda.kz habarlady. Kezdesýde saýda-ekonomıkalyq, kólik-tranzıttik, ǵylymı-tehnıkalyq jáne mádenı-gýmanıtarlyq salalardaǵy ekijaqty yntymaqtastyqty nyǵaıtý máseleleri talqylandy. Sonymen qatar, halyqaralyq kún tártibindegi ózekti jaıttar sóz boldy. Qazaqstan Prezıdenti Pákstannyń júıeli damýyndaǵy N.Sharıftiń atqarǵan rólin atap kórsetti. «Siz kúrdeli jaǵdaıda elde ekonomıkalyq jáne saıası reformalardy tabysty iske asyryp, Pákstannyń bedeli men rólin kóteretin belsendi halyqaralyq saıasat júrgizip otyrsyz. Qazaqstan men Pákstan ornalasqan óńirdiń elderi ózara saýda jáne mádenı qarym-qatynastar turǵysynan árdaıym tyǵyz baılanysty boldy. Ilgeride siz bizdiń burynǵy astanamyz Almatyǵa kelgen bolatynsyz. Sodan bergi az ýaqyt ishinde biz jańa elorda saldyq, ony búkil qazaqstandyqtar maqtan tutady. Bul qala – bizdiń táýelsizdigimiz ben elimiz egemendik jyldarynda jetken jetistikterdiń sımvoly», – dedi Memleket basshysy. N.Sharıf Nursultan Nazarbaevqa shaqyrtýy úshin alǵys aıtyp, eki halyqtyń baılanystarynyń san ǵasyrlyq tarıhy bar ekenin atap ótti. «Men Sizdiń kóshbasshylyq qasıetińizge tántimin jáne Sizdi erekshe qabilet ıesi dep esepteımin. Búginde Astanadan bizdiń kóretinderimizdiń bári – Sizdiń eńbegińiz», – dedi Pákstan premer-mınıstri. Sonymen qatar, N.Sharıf Nursultan Nazarbaevty, sondaı-aq búkil Qazaqstan halqyn Qazaq handyǵynyń 550 jyldyǵymen jáne el Konstıtýsııasynyń 20 jyldyǵymen quttyqtady. Aıdar О́risbaev. Derek, sýret: akorda.kz.