Taǵylymy mol baıqaý

Qazaq qashanda talanttan kem bolǵan emes. Tap basyp taba al­saq, balabaqsha men mektepte júrgen ul-qyzdyń boıynda alýa­n túrli óner jetip-artylady. Ony ulttyq úlgimen ushtastyrsań, tipti janyp keteri haq. Sonyń bir dáleli eki jyldan beri ult rýhanııatyna beıimdelip ótkizilip kele jatqan «Aqberen» respýblıkalyq oqýshylar baıqaýy der edik. Bul ıgi iske uıytqy bolyp otyrǵan – «Daryn» respýblıkalyq ǵylymı - praktıkalyq  ortalyǵy.  Osy ataý­ly mekemeniń dırektory Sholpan Qırabaevaǵa tildeskenimizde ol: «Bul baıqaýdy elimizdiń mek­tep­­terinde oqyp jatqan 5-11 synyp oqýshylary arasynda uıymdastyryp kelemiz. Basty maqsat, babalar dástúrin qaıta túletý, memlekettik dárejege ıe bolǵan tilimizdiń qadir-qasıetin mektep qabyrǵasynda júrgen oqý­shylardyń sanasyna  taza sińirý, talanttardy taýyp, ózgelerge úlgi etý. Bir sózben aıtqanda, sóz qadirin, óner mánin, saýatty  jazý úlgisin úıretý.  Jasyratyny joq, osy kúnderi qadirli qazaq sóziniń túp maǵynasyn túsinbeı, aıta beretinder kóbeıdi. Biz osyny bilim uıasynan bastap qolǵa alýdy nıet ettik. «Aqberen» baı­qaýy alǵash Astanada shańyraq kóterdi. Bıyl kıeli Túrkistan qala­synyń azamattary ótkizip berýge bel baılap, N.Ońdasynov atyndaǵy daryndy balalarǵa arnalǵan mektep-ınternat bazasynda uıymdastyrdy. Olarǵa jas urpaq atynan alǵys aıtýǵa tıistimiz», dedi. Alty baǵytta ótken baıqaýda komandalar boıynsha birinshi oryn – Shyǵys Qazaqstan, ekinshi oryn –Jambyl, úshinshi oryn – Qyzylorda oblystarynyń enshisine tıdi. Sol sekildi nomınasııalar boıynsha da aqyndar aıtysynda, músháırada, ulttyq aspapta, sheshendik ónerde, kórkemsóz oqýda, shyǵarma jazý­da ozyq dep tanylǵandar dıplomdarmen marapattalyp, baǵaly syı­lyqtarǵa ıe boldy. Aldaǵy jy­ly «Aqberen» baıqaýyn Shyǵys Qazaqstan oblysynda ótkizý kóz­delip otyr. Jalpy, ult rýhanııa­tyna urpaqty mektepten baýlý maqsatynda uıymdastyrylǵan ıgilikti sharaǵa qazaq jurtynyń sergek jandary serpilis tanytyp, qoldap jatsa nur ústine nur bolmaq. Súleımen MÁMET, «Egemen Qazaqstan».