Fýtbol. Qazaqstan kýbogy. Jartylaı fınalǵa shyqqandar belgili

ASTANA. 21 mamyr. Keshe fýtboldan Qazaqstan kýbogynyń shırek fınaldyq básekeleri ótti. Bul týraly egemen.kz habarlady. Tórt kezdesý de tartysqa toly boldy. Ásirese, Kókshetaýda ótken jergilikti «Oqjetpes» pen «Aqtóbe» arasyndaǵy match erekshe este qaldy. Alań ıeleri sońǵy mınýtqa deıin belsendilik tanytqanymen, sáttilik joldas bolmady. Sonymen qatar, Almatydaǵy «Qaırat» pen «Taraz» arasyndaǵy oıyn da jankúıerlerdiń kóńilinen shyqty. Premer-lıgada óz alańynda ótkizgen sońǵy 2 oıynda jeńilgen «Qaırat» bul matchqa erekshe jaýapkershilikpen qarady. Nátıjesinde qarsylasyn iri eseppen jeńip, jarystyń jartylaı fınalyna shyqty. Negizgi ýaqytta «Qaısarmen» teń oınaǵan (1:1) «Astana» qosymsha eki taımda jeńis golyn soǵyp, kelesi kezeńniń joldamasyn ıemdendi. Sondaı-aq, óz alańynda «Jetisýdyń» qaqpasyna jaýapsyz 2 gol soqqan «Tobyl» da kýboktan úmitin úzgen joq. Shırek fınaldyq oıyndardyń nátıjeleri. «Tobyl» (Qostanaı) – «Jetisý» (Taldyqorǵan) – 2:0 (1:0) Goldar: Shımkovıch 6, Delı 83. «Oqjetpes» (Kókshetaý) – «Aqtóbe» (Aqtóbe) 2:3 (1:3) Goldar: Rotkovıch (penaltı) 25, Azovskıı 90 – Pızzelı 20, Jýlpa 41, Danılo 45+1. «Qaısar» (Qyzylorda) – «Astana» (Astana) – 1:2 (1:0) Goldar: Iýnýzovıch 45 – Tvýması 69, 110. «Qaırat» (Almaty) – «Taraz» (Taraz) 4:1 Goldar: Goý 6, 58, Islamhan 13, Kókeev 87 – Mýhýtdınov (penaltı) 62. Jartylaı fınaldaǵy qarsylastar jerebe arqyly anyqtalady. Bul saty eki oıynnan turady. Alǵashqy kezdesý 2 maýsymda ótse, qarymta oıyndar 23 qyrkúıekke josparlanǵan. Elaman Qońyr. Derek: egemen.kz. Sýret: kpfl.kz.