Baılanys aıasy keńeıedi

Atyraýlyqtar ońtústikqazaqstandyqtarǵa shaǵyn avtobýs syılady Dostyq kóńil úshin jerdiń shalǵaılyǵy kedergi jasaı almaıdy. Budan úsh aı buryn Ońtústik Qazaqstanda Atyraý oblysynyń kúnderi ótken edi. Sol kezde atyraýlyq óner sheberleri ońtústikqazaqstandyqtarǵa án men jyrdan shashý shashqan bolatyn. Endi jaqynda Ońtústik Qazaqstan oblysynyń Atyraýda mádenıet kúnderi ótti. Qos oblystyń ataýlary basqasha atalǵany, biri ońtústikte, ekinshisi batysta ornalasqany bolmasa, Ońtústik Qazaqstan men Atyraýdy baılanystyratyn uqsastyqtar jeterlik. Atyraý men Shymkentti shekara qospaǵanymen, adamdary baılanystyryp jatyr. Bıyl Qazaq handyǵynyń 550 jyldyǵy keńinen toılanýda. Eger ońtústik pen batys baılanyspaǵanda, handyqtyń bir astanasy tóstiktiń tórindegi rýhanı astana – Túrkistan, ekinshi astanasy kıeli Saraıshyq bolmas edi. Elimizdiń memlekettik Ánuranynyń sózin Jumeken Nájimedenov, ánin Shámshi Qaldaıaqov jazbas edi. «Aq altyn» tergen ońtústik pen «qara altyn» óndirgen munaıly Atyraýdyń arasynda geografııalyq uqsastyq ta bar eken. Qazaqtyń sary dalasynyń uly ózeni – Syrdarııany ońtústik emip otyrsa, aıaly Aq Jaıyqtan batys óńiri nár alýda, dedi ońtústikqazaqstandyqtar óner sheberleriniń gala-konsertinde Atyraý oblysy ákiminiń orynbasary Shyńǵys Muqan. Ol Ońtústik Qazaqstan oblysynyń delegasııasyna shaǵyn avtobýsty syıǵa tartty. Ońtústik Qazaqstan oblysy ákiminiń orynbasary Erlan Aıtahanov aımaqaralyq baılanystyń tájirıbe almasý úshin qajettigine kóńil aýdardy. Ol Ońtústik óńirde jaryqqa shyqqan «Uly Dala ósıeti» kitabynyń 50 danasyn, «О́rkendegen, kórkemdengen Ońtústik» kitaby men «Qazynaly Ońtústik» kóptomdyǵyn, Túrkistandaǵy Q.Iаsaýı kesenesi salynǵan gobelen men Arystan bab kesenesi beınelengen kilemdi atyraýlyqtarǵa tartý etti. Atyraýlyqtarǵa «Súgir» atyndaǵy qazaq ult-aspaptar orkestriniń, «Tumar» folklorlyq ansambli men qobyzshylar ansambliniń, Sh.Qaldaıaqov atyndaǵy Ońtústik Qazaqstan oblystyq fılarmonııa ujymynyń, «Semser» toby men «Qazyna» bı tobynyń, ánshiler men ártúrli aspaptarda oınaıtyn sheberlerdiń óneri usynyldy. Ońtústik Qazaqstan oblystyq ázil-syqaq jáne satıra teatry usynǵan J.Aımaýytovtyń «Sylań qyz» qoıylymy da munaıly óńir turǵyndarynyń ystyq yqylasyn týdyrdy. Aıtqandaı, ońtústikqazaqstandyq óner sheberleri Mahambet jáne Isataı aýdandarynda óner kórsetti. Sonymen birge, ońtústik Qazaqstandaǵy murajaılar jádigerleri men qolóner sheberleri men sýretshileriniń týyndylary «Shyraıly ońtústik shejiresi» atty keńeıtilgen kórme-ekspozısııaǵa qoıyldy. Joldasbek ShО́PEǴUL, «Egemen Qazaqstan». ATYRAÝ.