Kópjaqty pishimdegi únqatysý

Ortalyq Azııadaǵy óńirlik máselelerdi, atap aıtqanda, qaýipsizdik, ekonomıka, sý resýrstaryn paıdalaný jáne ekologııa­ny qorǵaý, tranzıttik-kóliktik áleýetti damytýy men dúnıejúzi sharýashylyǵynyń baılanystaryna óńirdiń tartylýy deńgeıin arttyrý salalaryndaǵy máseleler sheshiminde Qazaqstan úshin Germanııamen jáne Fransııamen yntymaqtastyqty keńeıtýdiń eleýli áleýeti bar. Bul týraly Qazaqstan Res­pýb­lıkasynyń Syrtqy ister mınıstri Erlan Ydyrysov Astanada ótken Germanııa men Fransııanyń Ortalyq Azııa, Reseı, Qytaı, Aýǵanstan elderindegi jáne Eýropalyq odaq janyndaǵy elshileriniń birlesken konferensııasy barysynda málimdedi. Eýropalyq syrtqy áreketter qyzmetiniń (ESÁQ) joǵary laýazymdy ókilderi qatysqan is-sharada sóılegen sózinde E.Ydyrysov «Qazaqstan-2050» Strategııasynyń, Qazaqstan Prezıdentiniń «Nur­ly Jol – bolashaqqa bas­tar jol» Joldaýynyń negizgi basymdyq­taryn atap kórsetti. Osy keń aýqym­dy baǵdarlamalardyń júzege asyrylýy Qazaqstannyń áleýmettik-ekonomıkalyq sapaly damýyn qamtamasyz etip qana qoımaı, óńirlik máselelerdiń, sonyń ishinde Ortalyq Azııadaǵy bes eldiń qurlyq qorshaýynda qalý máselesiniń keshendi sheshilýine óz septigin tıgizedi, dedi qazaqstandyq mınıstr. QR SIM basshysy Qazaqstan men Eýropalyq odaq arasyndaǵy saýda-ekonomıkalyq yntymaqtastyqtyń qarqyndy damýyn atap ótip, búginde EO Qazaqstannyń eń iri saýda seriktesi jáne elimizdegi eń iri ınvestor ekenin de basa aıt­ty. Mınıstrdiń oıynsha, yntymaq­tastyqty odan ári damytý áleýeti ústi­mizdegi jyly qol qoıý jospar­lanyp otyrǵan QR men EO arasyndaǵy keńeıtilgen áriptestik jáne yntymaqtastyq týraly jańa kelisimde jatyr. Syrtqy ister mınıstri óz sózinde Eýropa memleketterimen jańa qaýip-qaterlerge jaýap berý turǵysynan yntymaqtastyqty tereńdete túsýdiń mańyzy joǵary ekenin aıtty. Mundaı qaýip-qaterlerge halyqaralyq koalısııa kúshteriniń shyǵýyna baılanysty Aýǵanstandaǵy saıası ahýaldyń shıelenisýi, «Islam memleketi» degen lańkestik uıymnyń belsene túsýi, sondaı-aq, Ýkraınadaǵy jaǵdaı jatady. Kezdesý barysynda aımaqtyq máselelerdi sheshýde Eýropa mem­leketteriniń belsendirek qatysýy men kómek kórsetýi oń faktor bo­lyp tabylyp, ózara tıimdi ýaǵda­lastyqtarǵa qol jetkizýge jete­leıtindigi týraly aıtyldy. GFR Federaldy úkimetiniń Shyǵys Eýropa, Kavkaz jáne Orta­lyq Azııa boıynsha ýákiletti elshisi Kord Maıer-Klodt Qazaq­stan­nyń EO-nyń Ortalyq Azııaǵa qatysty jańartylǵan strategııasyn jasaýdaǵy erekshe rólin atap ótti. Nemis dıplomaty bul qujatta aımaqtyq jáne eldik tásilder úılesetin bolady, sondaı-aq, Qazaqstan ony jasaýǵa súbeli úles qosty degendi alǵa tartty. О́z kezeginde Fransııanyń Syrtqy ister jáne halyqaralyq damý mınıstrliginiń qurlyqtyq Eýropa departamentiniń dırektory Erık Fýrne Qazaqstannyń Irannyń ıadrolyq baǵdarlamasyna qatysty kelissózder úderisine jáne Ýkraınadaǵy jaǵdaıdy retteýge qosyp otyrǵan úlesin atady. Onyń pikirinshe, bul jaıt eldiń aımaqtyq jáne jahandyq máselelerdi sheshýge aralasýymen qatar, jaýapty halyqaralyq seriktes retindegi bedeliniń artýyn kórsetedi. Jalpy alǵanda, qatysýshylar konferensııany Astanada ótkizý­diń ózindik orny bar ekeni týraly aıtyp, munyń Eýrazııa qurly­ǵynyń máselelerin jaqsyraq túsinýge, sonymen qatar, Eýropa memle­ketterimen ári qaraı yntymaq­tasýdyń joldary men bolashaǵyn aıqyndaýǵa múmkindik beretindigin alǵa tartty. Sáýlebek BIRJAN.