Baılanystar bekemdele túspek

Keshe Astanada Eýrazııalyq ekonomıkalyq komıssııa otyrysy ótti. Onda negizinen erteń Býrabaıda Memleket basshylarynyń deńgeıinde ótkeli otyrǵan Eýrazııalyq ekonomıkalyq odaqtyń Joǵary keńesine daıyndyq barysy, onda qaralatyn máseleler talqylandy. Komıssııa otyrysy negizinen jabyq rejimde ótti. Onda talqylanǵan máseleler jaıynda buqaralyq aqparat quraldary ókilderine Qazaqstan Premer-Mınıstriniń birinshi orynbasary Baqytjan Saǵyntaev aıtyp berdi. B.Saǵyntaevtyń aıtýynsha Joǵary keńestiń kún tártibine on bes másele shyǵady. Onyń ekeýi negizgi basymdyqqa ıe. «Biz dál osy eki máselege qatysty shaǵyn quramdaǵy kezdesýde uzaq talqylaýlar júrgizdik. Onyń birinshisi Eýrazııalyq ekonomıkalyq komıssııa alqasy músheleriniń sanyna qatysty boldy. Búginde ár elden úsh músheden qamtylǵan. Jalpy on bes múshe bar. Qazirgi kezde úsheý, ekeý nemese basqa format talqylanýda», dedi B. Saǵyntaev. Aıtalyq, ár elden úsh músheden qabyldaý buryn odaqqa múshe memleketter sany az bolǵanda qabyldanǵan sheshim bolatyn. Osy oraıda ol talqylaýlardan keıin bul másele Memleket basshylarynyń deńgeıine shyǵarylatyndyǵyn, prezıdentter qabyldaǵan sheshimge sáıkes bul format aıqyndalatynyn jetkizdi. Sonymen qatar, Úkimet basshysynyń birinshi orynbasary kelesi negizgi másele alqaǵa tóraǵalyq etetin elge qatysty bolǵanyn atap ótti. «Birinshi merzim Reseıdiń tóraǵalyǵymen ótti. Vıktor Hrıstenko Eýrazııalyq ekonomıkalyq komıssııa alqasynyń tóraǵasy qyzmetin tórt jyl atqardy jáne qazirgi kezde merzim aıaqtalýda, sondaı-aq, alqadaǵy barlyq múshelerdiń de merzimi támamdalýda. Jańa jyldan bastap bizde jańa adamdar, jańa tóraǵa keledi. Atap aıtqanda, bul másele de Memleket basshylarynyń deńgeıinde talqylanyp, olar tıisti sheshimdi qabyldaıdy», dedi B.Saǵyntaev. Premer-Mınıstrdiń birinshi orynbasary Baqytjan Saǵyntaev sondaı-aq, Eýrazııalyq ekonomıkalyq keńes otyrysynda Qazaqstannyń Dúnıejúzilik saýda uıymyna kirgennen keıingi mindettemeleri jaıynda da keńinen talqylanǵanyn tilge tıek etti. Sonymen qatar, taǵy bir másele Kedendik kodekstiń jobasy qaralǵan. Jalpylaı alǵanda, komıssııa músheleri bul otyrysta Eýrazııalyq ekonomıkalyq odaqqa múshe elder arasynda saýda-ekonomıkalyq, ınfraqurylymdyq baılanystardy odan ári bekemdeı túsýge septigin tıgizetin 30-ǵa jýyq qujattyń jobasyn talqylaǵan. Dınara BITIKOVA, «Egemen Qazaqstan».