«MAKS-2015» uıymdastyrý elementteri «KADEX-2016» kórmesinde  qoldanylatyn bolady

Burnaǵy kúni «MAKS-2015» XII halyqaralyq avıasııalyq-ǵaryshtyq salony bastaldy. Bul kórmege tájirıbe jınaqtaý jáne uıymdastyrý ádisterin jetildirý maqsatynda Qazaqstan Qorǵanys mınıstrliginiń áskerı qyzmetshileri qatysýda. «MAKS-2015» XII halyqaralyq avıasııalyq-ǵaryshtyq salonynyń aıasynda respýblıka Qorǵanys mınıstri Imanǵalı Tasmaǵambetov «Rosteh» memlekettik korporasııasynyń bas dırektory Sergeı Chemezovpen, «Rosoboronoeksport» bas dırektory Anatolıı Isaıkınmen, sondaı-aq, «Irkýt» korporasııasynyń prezıdenti Igor Demchenkomen jáne «Reseı tikushaqtary» AAQ bas dırektory Aleksandr Mıheevpen kezdesti. Kezdesýler otandyq qorǵanys óner­kásip keshenin damytý maqsatynda ótkizildi. Avıasalonnan avıatehnıkanyń áskerı jáne azamattyq úlgilerin jáne oǵan qatysty materıaldardy, sondaı-aq, tájirıbeli ushý apparattary men áskerı jıyntyqtardy kórýge bolady. Kórmege barlyǵy 800-den astam kompanııalar men uıymdar qatysýda. Osyndaı aýqymdy is-sharanyń kórshi elde ótýi aldaǵy kezde Astanada bolatyn «KADEX-2016» halyqaralyq kórmesin ótkizýge tájirıbe jınaqtaý úshin aıtarlyqtaı mańyzy bar. «Biz «KADEX» kórmesiniń erekshe, sırek ótetin ereksheligi bolǵanyn qalaımyz. Onyń kóp josparly qurylymy bar. Kórmede tek avıatehnıka jasaıtyn avıashoý ǵana emes, sonymen birge, qurlyq áskerleri jáne teńiz áskerleri óziniń qarý-jaraǵy men bar qýatyn kórsetedi. Bulardyń bári kez kelgen kórmeni uıymdastyrý úshin asa mańyzdy», – dedi respýblıka Qorǵanys mınıstrligi Áskerı-tehnıkalyq saıasat departamentiniń bastyǵy polkovnık Baqyt Qurmanbaev, dep habarlady osy vedomstvonyń baspasóz qyzmeti.