TikTok − álemdegi eń iri áleýmettik jelilerdiń biri. 2025 jyly platformanyń aı saıynǵy belsendi qoldanýshylary sany shamamen 1,59 mıllıard adam bolǵany málim. Bul TikTok-ty álemde eń kóp qoldanylatyn áleýmettik medıa platformalar qataryna qosady jáne onyń aqparat taratýdaǵy yqpalyn aıqyndaıdy.
Qazaqstanda da TikTok aýdıtorııasy jyl saıyn ósip jatyr. 2025 jylǵy derekter boıynsha eldegi eresek ınternet qoldanýshylardyń 86,5 %-y TikTok arqyly jarnamalyq kontentke qol jetkize alady, bul platformanyń keń taralǵanyn kórsetedi. Sonymen qatar, áleýmettik jelilerdi paıdalaný kólemi jalpy ınternet qoldanýshylary arasynda joǵary: 2025 jyly elde ınternet qoldanýshylar sany 19,2 mıllıonǵa jetken, onyń ishinde jastar arasynda TikTok óte tanymal ekeni baıqalady.
TikTok-tyń negizgi ereksheligi − qysqa beıneformat arqyly aqparat taratý. Bir mınýtqa jetpeıtin vıdeolardyń ishinde oqıǵanyń mánin ashý jýrnalısterden yqsham oılaýdy, naqty ári áserli til tabýdy talap etedi. Búginde jańalyqtyń mazmuny ǵana emes, ony usyný formasy da sheshýshi ról atqarady. Kórermen nazaryn alǵashqy sekýndtarda aýdarta almaǵan kontent keń aýdıtorııaǵa jetpeıdi.
Astanada TikTok jelisindegi jalǵan «emshige» sot úkimi shyqty
Qysqa vıdeonyń qoǵamǵa tıgizer oń yqpaly bar. Eń aldymen, aqparat taratý jyldamdyǵy artty. Oqıǵa ornynan túsirilgen beınematerıal kórermenge oqıǵanyń shynaıy beınesin jetkizedi. Sonymen qatar, TikTok − jastar arasynda keńinen taralǵan platforma. Buryn dástúrli medıany sırek tutynǵan jas aýdıtorııa áleýmettik, saıası jáne qoǵamdyq taqyryptarǵa osy jeli arqyly nazar aýdara bastady. Bul jýrnalıstıka úshin jańa múmkindikter alańyn ashty.
Sonymen birge qysqa formattyń belgili bir shekteýleri de bar. Kúrdeli taqyryptar keıde tereń taldaýsyz, jeńildetilgen túrde beriledi. Al platformanyń algorıtmdik júıesi emosııaǵa qurylǵan, qaralym jınaýǵa beıim kontentti alǵa shyǵarady. Mundaı jaǵdaıda aqparattyń naqtylyǵy men sapasy ekinshi orynǵa ysyrylyp, jalǵan nemese tekserilmegen málimetterdiń taralý qaýpi kúsheıedi.
TikTok juldyzy Habı Leım óziniń JI-syńaryn 975 mıllıon dollarǵa satty
Jýrnalıstıka úshin eń ózekti máseleniń biri − kásibı standarttardy saqtaý. TikTok-ta kez kelgen qoldanýshy ózin aqparat taratýshy retinde kórsete alady. Alaıda jýrnalıstik qyzmet jaýapkershilikpen, derekkózderdi tekserýmen jáne etıkalyq normalardy saqtaýmen tikeleı baılanysty. Osy erekshelikterdi eskermeı, áleýmettik jelidegi kez kelgen kontentti jýrnalıstıkamen teńestirý durys emes.
Degenmen TikTok-ty dástúrli jýrnalıstıkaǵa qarsy qoıý birjaqty kózqaras bolar edi. Qazirgi tańda kóptegen medıa uıymdar bul platformany aýdıtorııamen baılanys ornatýdyń, jańalyqqa qyzyǵýshylyq týdyrýdyń tıimdi quraly retinde paıdalanyp otyr. Qysqa vıdeo − aqparatqa bastaıtyn alǵashqy qadam, al tereń taldaý men tolyq túsindirý dástúrli medıanyń úlesinde qalýy tıis.
TikTok-ta qazaq ultyna til tıgizgen Qostanaı turǵyny 2 jylǵa sottaldy
Qorytyndylaı kele, TikTok dáýiri jýrnalıstıkany joqqa shyǵarǵan joq, kerisinshe ony jańa formatqa beıimdedi. Qysqa beıne qoǵamǵa aqparatqa qoljetimdilikti arttyrdy, alaıda sapa men jaýapkershilik máselesin aldyńǵy qatarǵa shyǵardy. Búgingi jýrnalıstıka úshin basty mindet − jyldamdyq pen tereńdiktiń, tanymaldyq pen senimdiliktiń arasyndaǵy tepe-teńdikti saqtaý.
Alýa MURATHANQYZY,
EUÝ stýdenti
