«Nurly Jol» baqytqa bóledi

Taqyrypqa aınalǵan bul sózdi Astanadaǵy №1 aýrýhananyń meıirbıkesi Sáýle Ábilqasymova aıtty. Keshe Astana, Almaty, Pavlodar, Qostanaı jáne Aqtóbe qalalarynda Sáýle sekildi taǵy 360 otbasy baspanaly bolyp, shadyman qýanyshtyń aıdynyna qulash urǵanyn kórdik. Elbasynyń bastamasymen halyqtyń arman-muratyn «Báıterek» holdıngi «Nurly Jol» baǵdarlamasynyń aıasynda júzege asyryp jatyr. Osyǵan oraı keshe jalǵa beriletin áleýmettik turǵyn úı baǵyty boıynsha páterlerdiń kezekti pýlyn úlestirý úshin Astana tórinde arnaıy is-shara ótti. Onda 52 astanalyq úı kiltin aldy. Aıta keterligi, úı elor­danyń tańdaýly aýdanyna oryn tepken. Imanǵa toly ıgi shara merekelik kóńil kúıge oraılas­tyrylyp uıymdastyrylypty. Páter ıelerine kiltter saltanatty mýzyka áýenimen tabys etildi. Baspanaly bolǵandardyń qýanyshyn sózben aıtyp jetkizý múmkin emes. Jalpy, jyl sońyna deıin «Nurly Jol» baǵdarlamasy aıasynda Almaty qalasy boıynsha – 88,6 myń sharshy metr (1 542 páter), Astanada – 20 myń sharshy metr (322 páter), Aqtóbede – 13,8 myń sharshy metr (216 páter), Pavlodarda – 25 myń sharshy metr (485 páter), Qostanaıda – 5,8 sharshy metr (91 páter) baspana salynyp, tapsyrylady. – Aǵymdaǵy jylǵy shildede respýblıka boıynsha úlestirilýi josparlanǵan páterlerdiń jalpy sany – 360-ty quraıdy. Páterlerdiń 50 paıyzy 35 jasqa deıingi jas otbasylarǵa beriledi. Qalǵan bóligi bıýdjettik uıymdar men memlekettik qyzmetshilerge, kópbalaly jáne múgedek balalary bar otbasylarǵa, jetimder men ata-ana qamqorlyǵynsyz qalǵan balalarǵa, sondaı-aq to­lyq emes otbasylar men áskerı qyzmetshilerge úlestirildi. Kezekte turǵandardyń tizimin jergilikti atqarýshy organdar iriktep, tó­lem qabilettiligin rastaý úshin «Báıterek» holdınginiń enshiles uıymy «Qazaqstan Ipotekalyq Kompanııasy» AQ-qa joldady. Munda arnaıy mamandar barlyq jaǵdaıdy saralaı kelip, baspanaǵa eń muqtaj jandardyń suranysyn qanaǵattandyryp otyr, – dedi holdıngtiń ınfraqurylymdardy damytý departamentiniń dırektory Qanat Ybyraev. Izgi sharanyń basynda júrgen basqarýshy dırektor Serjan Mádıev «Báıterek» holdıngi osy jylǵy kóktemniń naýryz, sáýir aılarynda Astana, Almaty, Shymkent, Kókshetaý, Semeı, Qostanaı qalalarynda 2 437 páter paıdalanýǵa usynylǵanyn aıtty. Sóıtip, búgingi kúnde osy nysandar boıynsha «Qazaqstan Ipotekalyq Kompanııasy» AQ baǵdarlama qatysýshylarymen shartqa qol qoıý rásimin aıaqtaǵaly otyrǵanyn da jetkizdi. Onyń sózine qaraǵanda, aǵymdaǵy jyl­dyń basynan beri holdıng Qazaqstan qalalarynda 2 797 jańa páterdi paıdalanýǵa tapsyryp, el azamattaryn qýanyshqa keneltken. Basqarýshy dırektor holdıng pen onyń enshiles uıymdarynyń basym mindetteriniń biri – qa­zaq­standyqtardy baspanamen qamtamasyz etý boıynsha Pre­zıdenttiń tapsyrmasyn oryn­daý ekenin atap ótti. Oǵan qosa, osy kezde «Nurly Jol» baǵdar­lamasyn múltiksiz iske asyrý asa mańyzdy bolyp tabylatynyn jáne onyń oryndalý barysy erekshe baqylaýǵa alynǵanyna nazar aýdardy. «Nurly Jol» baǵdarlamasynyń arqasynda turǵyn úı qurylysy salasynda memleket asa tıimdi talaptar negizinde halyqtyń áleýemettik álsiz toptaryn qoljetimdi, arzan baspanamen qamtamasyz etýdiń tetikterin taba bildi», dedi áńgime barysynda Q.Ybyraev. Holdıng basshylary aldaǵy ýaqytqa jasalyp otyrǵan jos­parlarymen de bólisti. Buıyrtsa, jalpy aýdany 453,5 myń sharshy metrlik 7805 páterdi taıaý bo­lashaqta aıaqtap, solar boıyn­sha shartqa qol qoıylypty. Onyń ishinde 2015 jyly – 361 myń sharshy metr bolatyn 6185 páter jáne 2016 jyly – 92,6 myń sharshy metrdi quraıtyn 1620 páter paıdalanýǵa beriledi eken. Al endi búgingi sharaǵa qaıta oralsaq, páter úlestirilip jatqan bes qalada satyp alynǵan jáne salynǵan jaldamaly turǵyn úıler Almatyda – 88,6 myń, Astanada – 20 myń, Aqtóbede – 13,8 myń, Pavlodarda – 25 myń, Qostanaıda 5,8 myń sharshy metrdi qurap otyr. Jalpy, 2015 jyly «Báı­terek» holdıngi jáne onyń enshiles qurylymdary – «Qa­zaqstan Ipo­tekalyq Kom­panııa­sy» AQ pen «Báıterek development» AQ jer­gilikti atqarýshy organdardyń ke­ze­ginde tur­ǵandar úshin 401 myń sharshy metrdi nemese shamamen 7 000 pá­terdi satyp alý men salýdy josparlar otyrǵan kórinedi. Bularmen birge, «О́ńirlerdi damytýdyń 2020 jylǵa deıingi baǵdarlamasyn» iske asyrý aıasynda baǵdarlamany iske asy­rýdyń búkil kezeńinde jalǵa beriletin turǵyn úıdiń 1483 myń sharshy metrin nemese shamamen 29 myń páter berý jos­parlanyp qoıylypty. Qýanyshty shara barysynda úıli bolǵan Sáýle Qýanyshqyzyn áńgimege tarttyq. «Shyndyǵyn aıtqanda, qýanyshymda shek joq. Ony qalaı bildirerimdi de bilmeımin. «Nurly Jol» baǵdarlamasy bir meni ǵana emes, myńdaǵan adamdy baspanamen qamtamasyz etip, qýanyshqa bólep jatqany búkil eldi shattandyryp otyr desem bolady. Osy baǵdarlamany jasap, júzege asyrýǵa tapsyrma bergen Elbasy Nursultan Nazarbaevqa aıtar alǵysymyz mol. Tabandatqan 12 jyldan beri memlekettik túrli baǵdarlamalar boıynsha páterli bolýǵa talaptanyp kelemiz. Juldyzdy sátimiz búgin týypty. Atam qazaq, «Izdegen jeter muratqa!», «Sabyr túbi sary altyn!» degen támsilderdi tekke aıtpaǵan eken. Ár iske sabyrmen qarap, sonyń jemisin jep otyrmyz», dedi bir bólmeli páterge ıe bolǵan S.Ábilqasymova. Nurbaı ELMURATOV, «Egemen Qazaqstan».