AQTО́BE. 15 qazan. Aqtóbedegi Marat Ospanov atyndaǵy memlekettik medısına ýnıversıtetiniń №1 oqý korpýsy aýmaǵynda jańa stýdenttik alma baǵy ashyldy. Bul týraly egemen.kz tilshisi habarlady.
Munda osy joǵary oqý ornynyń stýdentteri alǵashqy 120 túp alma aǵashynyń kóshetterin otyrǵyzdy. Kóshetterdi satyp alýǵa ýnıversıtettiń kásipodaq komıtetti qarjy bólip, baǵaly bastamaǵa qoldaý kórsetti. Baqqa otyrǵyzylatyn alma aǵashynyń kóshetteri jergilikti jerge beıimdelgen suryptar. Olar sýyqqa shydamdy, basqalaı da aýa raıynyń erekshelikterine tózimdi.
«Bul aksııa qorshaǵan ortanyń jaǵdaıyn jaqsartý maqsatynda jáne tárbıelik taǵylymdyq sıpat alady. Stýdentter jyl saıyn jas aǵash kóshetterin otyrǵyzatyn jáne kútip baptaıtyn bolady dep josparlap otyrmyz. Sonda ýnıversıtettegi oqý merziminde ádemi alma aǵashtary boı kóterip, jemisin beredi. Bárinen buryn baqtyń sáni keledi. Kóshetti otyrǵyzǵan stýdent óziniń aty jazylǵan lenta baılaıdy, kóshettiń tamyr tartyp, ósip ketýin jaýapkershiligine alady. Bul bolashaq dárigerlerdiń boıynda olarǵa asa qajetti jaýapkershilik sezimin qalyptastyrýǵa yqpal etedi. Osylaı stýdent tek ózi oqyǵan ýnıversıtet tarıhyna iz qaldyryp qana qoımaı, qalany kógaldandyrýǵa da úles qosady», – deıdi ýnıversıtet kásipodaq komıtetiniń tóraǵasy Jangeldi Shaımybetov.
Satybaldy Sáýirbaı.
Derek, sýret: egemen.kz.
