Polıseıler naýqas balany óleri aldynda qataryna aldy (foto)

ASTANA. 2 sáýir. AQSh-tyń Pensılvanııa shtatynda turatyn Djoýı Fabýs degen 8 jasar bala jergilikti polıseılerdiń túsinistigi men zor adamgershiligi arqasynda az kúnge bolsa da sheksiz qýanyshqa bólendi. Bul týraly Livejournal.maks saıtynda habarlandy. Másele mynada. Budan birqatar ýaqyt buryn Djoýıdiń rakpen aýyratyny belgili bolǵan. Bala kishkentaı kúninen polıseı bolýdy armandaıdy eken. Al dárigerler onyń ómirdegi ólsheýli merziminiń ózi jaqynda óshkeli turǵanyn jetkizedi. Aýrýdyń osylaısha birjola aıyqpaýǵa qaraǵanyn anyq bilgennen keıin balanyń ákesi jergilikti polısııa basqarmasyna baryp, onyń basshysy Djon Mekımen aqyldasady. Ekeýara áńgimeniń qorytyndysynda tártip saqshylarynyń bastyǵy Djoýıdi ózderiniń qatarlaryna qabyldaýǵa sheshim qabyldaıdy. Sóıtip, bir kúnniń ishinde bala saltanatty jaǵdaıda polısııa qataryna ofıser sheninde alynady. Ol munda Tom Rıgattı degen ofıserge áriptes etip bekitip beriledi. Djoýı áriptesimen birge kóshede patrýldik jasap júredi. Ol tipti kóligin kóshede durys qoımaǵany úshin Rıgattıdiń qyzyna aıppul da salyp úlgeredi. Osylaısha pensılvanııalyq polıseıler kishkentaı balany az kúnge bolsa da zor qýanyshqa bólep, ómirlik armanyna jetkizedi. Biraq Djoýı Fabýs kóp uzamaı qaıtys bolady. Al onyń jerleý rásimine Pensılvanııamen qatar jatqan kórshi tórt shtattan da polıseıler arnaıy kelip qatysady. Murat Aıtqoja. Derek, sýret:  Facebook jelisi.