Elbasy Oraldaǵy resmı is-sharalar saraıynda boldy

ASTANA. 2 sáýir. Elbasy Batys Qazaqstan oblysyna sapary barysynda resmı is-sharalar saraıynda boldy. Ol jerde Prezıdent Batys Qazaqstan oblysyndaǵy etno-mádenı birlestikter, shyǵarmashyl zııaly qaýym ókilderimen jáne Aýǵan soǵysy jaýyngerlerimen áńgimelesti. Bul týraly Aqordanyń baspasóz qyzmetine súıenip egemen.kz habarlady. Memleket basshysy Qazaqstan halqy assambleıasy qyzmetiniń mańyzdylyǵyna toqtaldy. «Bir-birimizge degen qurmet, toleranttylyq bolǵanda ǵana eldiń ornyqty damýy saqtalady. Men Qazaqstan halyqtyń birliginiń arqasynda ǵana ilgerilep kele jatqanyn únemi aıtyp kelemin. Uly Otan soǵysyndaǵy Jeńistiń 70 jyldyǵy taıap qaldy. Bizdiń baqytymyz – jeńimpaz ákelerdiń balalary bolǵandyǵymyz. Bizge ardagerlerimizdi qadirlep, jastardy tarıhqa qurmetpen qaraý turǵysynan tárbıeleý qajet. Sondaı-aq, biz bıyl basqa da mańyzdy datalardy atap ótetin bolamyz», – dedi Nursultan Nazarbaev. Barlyq etnostardyń atynan sóıleýshiler Memleket basshysyna tatýlyq pen kelisimge, kásipkerlikpen aınalysýǵa mol múmkindikter men jaǵdaılar jasaýǵa, halyqtyń ál-aýqatyn arttyrýǵa baǵyttalǵan saıasat úshin alǵys aıtty. Elaman Qońyr. Derek, sýret: egemen.kz.