Qyzylordada 2 kúnde 1400-ge jýyq quqyq buzýshylyq anyqtaldy

QYZYLORDA. 27 tamyz. Qyzylorda oblysynda tamyz aıynyń 24-28 kúnderi aralyǵynda krımınogendik ahýaldy seıiltý, quqyq tártibi men jol qozǵalysy qaýipsizdigin qamtamasyz etý, kósheler men basqa da qoǵamdyq oryndarda qylmystardy eskertý jáne jolyn kesý baǵytynda oblys kóleminde «Quqyq tártibi» jedel-profılaktıkalyq is-sharasy ótip jatyr. Bul týraly egemen.kz tilshisi habarlady. Atalǵan is-sharanyń 2 kúninde barlyǵy 1355 ákimshilik quqyq buzýshylyq anyqtaldy. Onyń ishinde avtokólikti mas kúıinde basqarǵan 22 júrgizýshi anyqtalsa, qaýipsizdik beldigin taqpaı avtokólik basqarǵan 310 júrgizýshige, uıaly telefonmen sóılesip kólik basqarǵan 210 júrgizýshige, jyldamdyqty shamadan tys asyrǵan 98 júrgizýshige ákimshilik hattama toltyryldy. Sonymen qatar, esepti merzimde qalalar men eldi mekenderdiń aýmaqtaryn kóriktendirý erejelerin buzýdyń 113 deregi, qoǵamdyq oryndarda spırttik ishimdik ishý nemese mas kúıinde júrýdiń 92 deregi, kámeletke tolmaǵandardyń túngi ýaqytta zańdy ókilderiniń erip júrýinsiz úı-jaıdan tys jerde júrýiniń 82 deregi, basqa da usaq buzaqylyqtardyń 87 deregi anyqtalǵan. Jalpy, 2 táýlik ishinde 24 qylmys izi sýymaı ashyldy. Izdeýde júrgen 3 qylmysker ustalyp, buryn jasalǵan 13 qylmys ashyldy. Erjan Baıtiles. Derek: egemen.kz. Sýret: total.kz.